Verð á burrito hefur orðið að óvæntu hitamáli innan Repúblikanaflokksins í Bandaríkjunum, þar sem vaxandi áhyggjur eru af því að hátt verðlag og framfærslukostnaður geti reynst flokknum dýrkeyptur í þingkosningunum í nóvember.
Umræðan hófst eftir að Andrew Kolvet, talsmaður íhaldssömu ungmennasamtakanna Turning Point USA, birti færslu á X þar sem hann vitnaði í háskólanema innan samtakanna sem sagði að burrito ætti ekki að kosta 20 Bandaríkjadali. Kolvet sagði að þótt hluta verðhækkana mætti rekja til verðbólgu í kjölfar Covid-faraldursins og forsetatíðar Joe Biden væri upplifun almennings sú sama: nauðsynjavörur væru einfaldlega orðnar of dýrar.
Ummælin hafa hrundið af stað hörðum skoðanaskiptum meðal íhaldsmanna. Fox News hefur jafnvel lýst deilunum sem „borgarastyrjöld“ innan flokksins.
Dan Crenshaw, þingmaður Repúblikanaflokksins frá Texas, gagnrýndi kvartanir ungs fólks og sagði námsmenn frekar eiga að fá sér vinnu, borða ódýran mat og búa með fleirum líkt og fyrri kynslóðir hefðu þurft að gera.
Marc Thiessen, fyrrverandi ráðgjafi George W. Bush Bandaríkjaforseta og nú dálkahöfundur, tók í svipaðan streng. Hann sagðist sjálfur hafa lifað á núðlum eftir útskrift og unnið hörðum höndum í stað þess að kvarta undan verðlagi.
JD Vance varaforseti svaraði Thiessen hins vegar með persónulegu skoti og sagði augljóst af líkamsvexti hans að hann hefði „aldrei sleppt burrito“.
Fleiri á hægri vængnum hafa varað við því að gera lítið úr áhyggjum kjósenda. Angela Morabito, talsmaður Defense of Freedom Institute, sagði að ef svar hægrimanna við framfærsluvandanum væri að segja fólki að borða verr myndu Repúblikanar tapa kosningunum í nóvember og eiga það skilið.
Donald Trump Bandaríkjaforseti hefur á sama tíma haldið því fram að verðbólga sé á niðurleið og hafnað því að tollastefna hans hafi ýtt undir verðhækkanir. Samkvæmt opinberum tölum fór verðbólga í 4,2 prósent í maí en lækkaði í 3,5 prósent í júní.
Framfærslukostnaður er áfram ofarlega í huga bandarískra kjósenda. Í nýlegri könnun Marquette-háskóla nefndu 35 prósent svarenda hann sem helsta áhyggjuefni sitt, töluvert fleiri en nefndu stríðið í Íran.
Athugasemdir