Hollenska lögreglan hefur handtekið 26 ára mann sem grunaður er um að hafa sært tvo menn í röð hnífaárása í Rotterdam í dag. Að sögn lögreglu virðist sem fórnarlömbin hafi verið valin af handahófi.
Fyrstu tvö atvikin áttu sér stað um klukkan 9:30 að staðartíma í Spangen-hverfinu, vestur af miðborg Rotterdam. Annað þeirra átti sér stað í íbúðargötu en hitt við Marconiplein, sem er mikilvæg samgöngumiðstöð í borginni.
Lögreglan í Rotterdam greindi frá því að tveir menn hefðu særst í árásunum og að ekkert benti til þess að þeir hefðu tengst árásarmanninum.
Annar mannanna var fluttur á sjúkrahús til aðhlynningar vegna áverka sinna. Hinn fékk aðhlynningu sjúkraflutningamanna á vettvangi. Ekki liggja fyrir frekari upplýsingar um líðan mannanna eða hversu alvarlegir áverkar þeirra eru.
Um hálfri klukkustund eftir fyrstu árásirnar barst lögreglu síðan tilkynning um tilraun til hnífaárásar við Brug van Cyrene-göngubrúna nærri Rotterdam–Haag-flugvellinum í norðvesturhluta borgarinnar.
Lögregla telur að sami maður hafi komið við sögu í öllum þremur atvikunum. Grunur leikur jafnframt á að hann hafi ferðast á milli staðanna í bifreið.
Í kjölfarið tókst lögreglu að hafa uppi á hinum grunaða og handtaka hann. Um er að ræða 26 ára karlmann frá Rotterdam.
Athugasemdir