Pawel Bartoszek, stærðfræðingur og þingmaður, hvetur til þess að Ísland gangi í Evrópusambandið til að liðka fyrir netverslun landsmanna. Í nýjum pistli vekur hann athygli á þeim mikla aukakostnaði og tollaveseni sem mætir Íslendingum þegar þeir panta vörur erlendis frá.
Hann bendir á að samkvæmt reiknivél Póstsins geti hliðarkostnaður vegna virðisaukaskatts, umsýslu og sendingar numið rúmum 2.600 krónum fyrir vöru sem kostar upphaflega 5.000 krónur í erlendri netverslun. Kostnaðurinn getur því fljótt numið rúmlega helmingi af kaupverðinu sjálfu.
„Hver kannast ekki við að panta eitthvað á netinu og þurfa svo að borga meira eftir að varan kemur til landsins?“ spyr Pawel í pistli sínum.
EES-samningurinn dugir ekki til
Þótt sumar stærri erlendar netverslanir séu farnar að innheimta íslenskan virðisaukaskatt fyrirfram breytir það ekki grunnvandanum að mati Pawels. Hann minnir á að þótt Ísland sé hluti af Evrópska efnahagssvæðinu (EES), standi landið utan tollabandalags Evrópusambandsins.
Vegna þessa þurfa vörur sem koma frá Evrópu enn að fara í gegnum hefðbundna tollafgreiðslu hér á landi, jafnvel þótt enginn tollur leggist á vöruna sjálfa. Þessu fylgja óhjákvæmileg umsýslugjöld og tafir.
Pawel dregur upp þá sýn að með fullri aðild að Evrópusambandinu gætu Íslendingar átt í beinum og hindrunarlausum viðskiptum við gríðarstóran markað.
„Væri ekki frábært ef við gætum fengið vörur frá 450 milljóna manna markaði sendar til okkar án alls þessa auka kostnaðar og vesens?“ spyr Pawel að lokum og ljóst er að hann telur svarið liggja í nánara Evrópusamstarfi.
Athugasemdir