Vahid Kabiny Kohan hefur verið dæmdur í fimm mánaða skilorðsbundið fangelsi í Héraðsdómi Reykjavíkur fyrir brot í nánu sambandi gegn fyrrverandi sambýliskonu sinni.
Kohan var ákærður fyrir að hafa aðfaranótt 4. ágúst 2022 ráðist með alvarlegum hætti á konuna á sameiginlegu heimili þeirra.
Samkvæmt ákæru kýldi hann konuna ítrekað í hægra auga, tók hana kverkataki þannig að hún átti erfitt með andardrátt og beitti hana frekara ofbeldi, meðal annars með höggum og spörkum. Konan hlaut fjölmarga áverka, meðal annars á hálsi, bringu, andliti, handleggjum og fótleggjum.
Kohan neitaði sök og hélt því meðal annars fram við rannsókn málsins að hann hefði aðeins ýtt konunni frá sér. Héraðsdómur taldi framburð konunnar hins vegar trúverðugan og að hann fengi sterka stoð í læknisvottorðum, ljósmyndum af áverkum og framburði vitna.
Dómurinn taldi sannað að Kohan hefði viðhaft endurtekna og ofbeldisfulla hegðun gagnvart konunni og skapað viðvarandi ógnarástand á heimilinu. Atlaga hans í ágúst 2022 var jafnframt metin alvarleg og talin hafa ógnað lífi, heilsu og velferð konunnar. Hann var því sakfelldur fyrir brot í nánu sambandi.
Við ákvörðun refsingar var meðal annars horft til þess að brotið átti sér stað á heimili fjölskyldunnar. Dómurinn gagnrýndi jafnframt þann langa tíma sem málsmeðferðin tók og tók fram að Kohan yrði ekki kennt um dráttinn.
Refsingin var ákveðin fimm mánaða fangelsi en fullnustu hennar frestað skilorðsbundið í tvö ár. Kohan var auk þess dæmdur til að greiða konunni 800 þúsund krónur í miskabætur auk vaxta og allan sakarkostnað málsins.
Athugasemdir