Nýleg myndbirting í íbúahópnum Vesturbærinn á Facebook hefur vakið athygli og umræðu um mörk nágrannavaktar og fordóma. Í færslunni, sem nú hefur verið eytt, voru tveir unglingar sagðir vera að „þvælast um garða“ í Hjarðarhaga og Fornhaga og íbúar varaðir við þeim. Í ljós kom að drengirnir voru vinnufélagar á leið heim til sín.
Pablo Santos, faðir annars drengsins, tjáði sig um málið í hópnum til að vekja fólk til umhugsunar. Hann útskýrir að strákarnir hafi einfaldlega verið að flýta sér og stytta sér leið heim.
„Okkar litla samfélag þarf að passa sig“
Pablo segir færsluna hafa verið óviðeigandi, sérstaklega í ljósi þess að annar drengjanna er með annað útlit en dæmigerður hvítur Íslendingur. Hann tekur fram að hann skilji og styðji nágrannavaktina fyllilega, en varar við því að fólk sé of fljótt að dæma.
„Okkar litla samfélag þarf að passa sig á að dæma ekki strax og hugsa betur um hegðun okkar varðandi öryggi og óvissu,“ skrifar Pablo.
Hann fagnar því að færslan hafi verið tekin niður og að umræðan sem skapaðist í kjölfarið hafi sýnt að svona atferli sé ekki í lagi.
Leitar eftir skilningi frekar en átökum
Sá sem birti myndina upphaflega hefur ekki svarað skilaboðum frá Pablo, en Pablo áréttar að tilgangur hans sé ekki að efna til deilna.
„Ég er ekki að leita eftir átökum heldur frekar skilningi á því hvað hefði vakað fyrir honum. Þetta eru viðkvæmir tímar í samskiptum manna á milli og sem betur fer búum við í landi þar sem friður og mannréttindi eru til staðar og mjög mikilvæg,“ segir Pablo að lokum og sendir ást og kærleika til íbúa.
Málið sýnir hversu hratt misskilningur getur magnast upp á samfélagsmiðlum og hversu mikilvægt er að sýna yfirvegun áður en fullyrðingar og myndir af fólki eru birtar opinberlega.
Athugasemdir