Framkvæmdir við endurbætur á búningsklefum Sundhallar Reykjavíkur hafa reynst mun umfangsmeiri en upphaflega var gert ráð fyrir. Af þeim sökum verður opnunartíma Sundhallarinnar breytt tímabundið á virkum dögum þegar skólasund hefst að nýju 25. ágúst.
Vinna við búningsklefana hófst fyrr í sumar og stendur enn yfir. Á meðan framkvæmdunum stendur hafa karlar notað gamla búningsklefann á neðri hæð en konur tvo útiklefa. Klefarnir rúma samtals um 60 gesti og verður því að miða hámarksfjölda gesta í lauginni við þann fjölda.
Samkvæmt tilkynningu frá Reykjavíkurborg verður Sundhöllin opin á mánudögum frá klukkan 6.30 til 10 og aftur frá 14 til 22. Á þriðjudögum verður opið frá 6.30 til 8.30 og 14 til 22.
Á miðvikudögum verður opnunartíminn óbreyttur, frá 6.30 til 22. Á fimmtudögum verður opið frá 6.30 til 8.30 og aftur frá 15 til 22. Á föstudögum verður opið frá 6.30 til 10 og 15 til 22.
Breytingarnar eru nauðsynlegar vegna þess að skólasund hefst að nýju þriðjudaginn 25. ágúst og takmarkað rými er í búningsklefum á meðan framkvæmdunum stendur.
Reykjavíkurborg segir áherslu lagða á að ljúka framkvæmdunum eins fljótt og kostur er svo starfsemi Sundhallarinnar geti komist aftur í hefðbundið horf. Vonir standi til þess að hægt verði að opna kvennaklefann að nýju á haustmánuðum.
Borgin biðst velvirðingar á þeim óþægindum sem breytingarnar kunna að valda og þakkar gestum fyrir þolinmæði og skilning. Jafnframt er bent á að árskort og aðrar áskriftir gildi í öllum sundlaugum Reykjavíkur.
Athugasemdir