Kanadíski leikarinn og grínistinn Mike Myers vakti athygli vegfarenda í Toronto á dögunum þegar hann tók óvænt nokkur dansspor á lestarstöð í borginni.
Myers, sem er einna þekktastur fyrir hlutverk sitt sem Austin Powers í samnefndum kvikmyndum, sést í myndskeiði dansa við klassíska tónlist sem götulistamaður lék á hljómborð á stöðinni.
Leikarinn lét nærstadda vegfarendur ekki trufla sig heldur sýndi meðal annars ballettspor, snerist í hringi, stökk og sveiflaði sér um gólfið á meðan fólk gekk fram hjá á leið sinni í lestir.
Myers, sem er 63 ára, hefur áður sýnt danshæfileika sína á hvíta tjaldinu. Eitt þekktasta dæmið er upphafsatriði gamanmyndarinnar Austin Powers: International Man of Mystery frá árinu 1997.
Myndskeiðið frá Toronto hefur vakið athygli á samfélagsmiðlum, enda sjaldgæft að sjá stórstjörnu á borð við Myers taka óvænt dansspor á meðal almennings.
Myers fæddist í Toronto árið 1963 og sló í gegn í bandaríska skemmtiþættinum Saturday Night Live. Auk Austin Powers-myndanna er hann meðal annars þekktur fyrir Wayne's World og sem rödd tröllsins Shrek í samnefndum teiknimyndum.
Athugasemdir