Ástralskur grunnskólakennari, Leah Stewart, hefur lýst því hvernig hún barðist fyrir lífi sínu þegar stór hákarl réðst á hana við Coogee-strönd í Sydney í júní. Stewart missti hluta vinstri handleggs í árásinni og var haldið sofandi í öndunarvél í um tíu daga.
Stewart var í sjósundi að morgni 13. júní þegar hún varð vör við hákarlinn. Vitni töldu að um allt að fjögurra metra langan hvíthákarl hefði verið að ræða.
Í viðtali við 60 Minutes lýsir Stewart því að hún hafi fyrst séð stóran ugga skammt frá annarri sundkonu. Í fyrstu taldi hún að um höfrung væri að ræða en áttaði sig fljótt á hættunni.
Skömmu síðar nálgaðist hákarlinn hana. Stewart óttaðist að hann myndi bíta hana í andlitið og ákvað því að slá til hans.
„Ég hugsaði: Hvaða útlim er ég tilbúin að missa? Ég er rétthent og ákvað því að slá með vinstri,“ sagði Stewart.
Hákarlinn beit í vinstri framhandlegg hennar og olli þar gríðarlegum áverkum. Í kjölfarið beit hann í vinstra læri hennar og dró hana undir yfirborðið.
Stewart segist þá hafa hugsað um unga dóttur sína og ákveðið að berjast áfram. Hún sneri sér að hákarlinum og sló hann ítrekað þar til hann sleppti takinu.
„Þetta var eins og að berjast við risaeðlu. Hann var svo stór að það var eins og að kýla múrsteinsvegg,“ sagði hún.
Stewart komst aftur upp á yfirborðið og var aðstoðuð í land af brettamanninum Charlie Verco, sem var staddur skammt frá. Sjúkraflutningamenn hlúðu að henni á ströndinni áður en hún var flutt á sjúkrahús.
Stewart, sem er á fertugsaldri, var haldið í dái eftir árásina. Læknar þurftu að fjarlægja hluta vinstri handleggs hennar vegna áverkanna.
Árásin kemur í kjölfar nokkurra alvarlegra hákarlaárása í Ástralíu á þessu ári. Vísindamenn hafa meðal annars velt því upp hvort hækkandi sjávarhiti sé að breyta göngum hákarla og kunni þannig að hafa áhrif á tíðni árekstra þeirra við fólk.
Samkvæmt áströlskum gagnagrunni hafa nærri 1.300 atvik þar sem hákarlar hafa komist í snertingu við fólk verið skráð við Ástralíu frá árinu 1791. Meira en 260 þeirra hafa reynst banvæn.
Athugasemdir