Fjölskyldufaðir í Houston í Texas varð fyrir heldur óvenjulegri reynslu þegar hann beið eftir heimsendum mat á heimili sínu í síðustu viku. Sendill sem kom með pöntunina frá DoorDash reyndist vera kviknakinn þegar hann lagði matinn við útidyrnar.
Kiante Matlock greindi frá atvikinu í samtali við Fox 26. Hann var heima ásamt dóttur sinni mánudaginn 24. ágúst og beið eftir matarpöntun þegar tilkynning barst um að maturinn hefði verið afhentur.
Matlock ákvað að skoða upptöku úr Ring-öryggismyndavél við heimilið og brá verulega þegar hann sá sendilinn. Á myndskeiðinu sást maðurinn koma að húsinu og skilja matinn eftir við dyrnar án þess að vera í nokkrum fötum.
Matlock sagðist hafa ákveðið að henda matnum í kjölfarið og tilkynnti atvikið þegar í stað til DoorDash. Fyrirtækið endurgreiddi pöntunina og lokaði varanlega á aðgang sendilsins að þjónustunni.
Talsmaður DoorDash fordæmdi háttsemi mannsins harðlega og sagði hana bæði ógeðfellda og með öllu óásættanlega.
Fyrirtækið sagði að um leið og því hefði verið gert kunnugt um atvikið hefði sendillinn verið fjarlægður af vettvanginum. DoorDash liði hvorki kynferðislega áreitni né aðra óviðeigandi hegðun af þessu tagi.
Jafnframt kvaðst fyrirtækið reiðubúið að aðstoða lögreglu yrði málið tekið til rannsóknar. Viðskiptavinir sem yrðu fyrir sambærilegum atvikum væru hvattir til að tilkynna þau tafarlaust til fyrirtækisins og lögreglu.
Athugasemdir