Einn lést og tveir lögreglumenn særðust í skotbardaga í bænum Overasselt í austurhluta Hollands aðfaranótt þriðjudags. Hollenskir fjölmiðlar greina frá því að málið kunni að tengjast einum eftirlýstasta fíkniefnasmyglara landsins.
Lögregla segir að nokkrir hafi verið handteknir í tengslum við málið. Lögreglumennirnir tveir sem særðust eru ekki taldir í lífshættu.
Öryggismyndband sem hollenska dagblaðið De Telegraaf birti sýnir stóran hóp grímuklæddra einstaklinga á ferð um svæðið. Sumir þeirra virðast bera öflug skotvopn.
Samkvæmt hollenskum fjölmiðlum er grunur um að árásin tengist undirheimum fíkniefnasmyglarans Jos Leijdekkers, sem gengur einnig undir viðurnefninu „Bolle Jos“. Hann hefur áður verið dæmdur fyrir aðild að umfangsmiklu alþjóðlegu kókaínsmygli og er meðal eftirlýstustu manna Hollands.
Talið er að Leijdekkers dvelji í Síerra Leóne og hefur verið greint frá því að hann eigi í sambandi við dóttur Julius Maada Bio, forseta landsins.
Dagblaðið De Gelderlander greinir frá því að maðurinn sem lést hafi starfað sem öryggisvörður við húsið þar sem skotárásin varð. Skotið hafði einnig verið á húsið á síðasta ári.
David van Weel, dómsmálaráðherra Hollands, fordæmdi árásina og sagði slíkt ofbeldi ekki verða liðið.
Athugasemdir