Boðað hefur verið til Sniðgöngunnar 2026 á höfuðborgarsvæðinu og Akureyri á laugardag til að sýna Palestínumönnum samstöðu og þrýsta á íslensk stjórnvöld um frekari aðgerðir gagnvart Ísrael. Skipuleggjendur krefjast meðal annars þess að Ísland rifti fríverslunarsamningi sínum við Ísrael og slíti stjórnmálatengslum við landið.
Gangan hefst klukkan 14 á báðum stöðum og er þetta í þriðja sinn sem hún fer fram.
Á höfuðborgarsvæðinu verður lagt af stað frá Thorsplani í Hafnarfirði. Á Akureyri hefst gangan við Íslandsklukkuna hjá Háskólanum á Akureyri og verður leiðin um þrír kílómetrar.
Að göngunum loknum verða samstöðufundir á Klambratúni í Reykjavík klukkan 17 og á Ráðhústorginu á Akureyri klukkan 15.
Að Sniðgöngunni standa meðal annars BDS Ísland, Félagið Ísland-Palestína, Vonarbrú og Háskólafólk fyrir Palestínu.
Skipuleggjendur segja markmiðið jafnframt vera að vekja athygli á sniðgöngu og fá fleiri til þátttöku.
Athugasemdir