Stórhætta á að Vogur lokaði

Mikil ólga ríkir innan SÁÁ og ein­kenn­ist staðan á sjúkra­hús­inu Vogi af krísu­stjórnun alla daga. Fastir hnútar hafa mynd­ast á milli stjórnar sam­tak­anna og stórs hluta starfs­fólks á með­ferð­ar­sviði í kjöl­far afsagnar for­stjóra og lyk­il­starfs­manna. Á meðan stjórnin telur ágrein­ing­inn snú­ast um fram­tíð­ar­stefnu félaga­sam­tak­anna, sakar frá­far­andi lækn­inga­stjóri stjórn­ina um óeðli­leg afskipti af heil­brigð­is­þjón­ustu.

Anna Hildur Guð­munds­dóttir for­maður SÁÁ sagði í Kast­ljósi í fyrra­kvöld að deil­urnar megi rekja til ágrein­ings milli stjórnar og Ragn­heiðar Huldu Frið­riks­dóttur, fyrr­ver­andi for­stjóra, um hlut­verk sam­tak­anna og víð­feðmi starf­sem­innar. Hún telur það hlut­verk ekki stang­ast á við heil­brigð­is­starfið og hafnar því alfarið að stjórnin hafi skipt sér af fag­legu starfi lækna.

Sú lýs­ing stang­ast hins vegar á við mál­flutn­ing Val­gerðar Rún­ars­dóttur, frá­far­andi fram­kvæmda­stjóra lækn­inga, sem einnig ræddi við Kastljós í vik­unni. Val­gerður full­yrðir að stjórnin hafi sýnt af sér óeðli­leg afskipti og að brott­för for­stjór­ans hafi verið skipu­lögð af hálfu stjórn­ar­innar til að bola henni úr starfi.

Átökin hafa rist djúpt inn í raðir starfs­fólks en yfir 60 starfs­menn á með­ferð­ar­sviði und­ir­rit­uðu van­trausts­yf­ir­lýs­ingu á hendur stjórn­inni. Þá kröfð­ust fram­kvæmda­stjóri lækn­inga og fag­stjóri með­ferð­ar­stöðv­ar­innar í Vík þess að for­stjór­inn yrði feng­inn aftur til starfa. Stjórnin varð ekki við þeim kröfum.

Í kjöl­far hóp­upp­sagna lyk­il­starfs­manna boð­aði Embætti land­læknis stjórn SÁÁ á fund. Skilaboð emb­ætt­is­ins voru afdrátt­ar­laus: Ef ekki yrði ráð­inn nýr fram­kvæmda­stjóri lækn­inga taf­ar­laust til að bera ábyrgð á sjúkra­skrám og sjúkra­hús­inu, myndi starf­semi Vogar stöðvast.

Til að bregð­ast við kröf­unum og halda starf­sem­inni gang­andi hefur stjórnin skipað nýja yfir­stjórn. Baldvina Ýr Haf­steins­dóttir hefur verið ráðin sem nýr for­stjóri SÁÁ, Konráð Gylfason tekur við sem for­stjóri á Vogi og Jón Áki Jensson, geð­læknir, bæt­ist í hóp­inn sem nýr fram­kvæmda­stjóri lækn­inga. Embætti land­læknis fylgist nú náið með gæðum og öryggi þjón­ust­unnar við sjúk­linga á meðan unnið er úr krís­unni.