Umboðsmaður Alþingis taldi ekki tilefni til að gera athugasemdir við ákvarðanir Persónuverndar um að taka tvær kvartanir einstaklings ekki til frekari rannsóknar. Málunum var lokið með bréfi 15. september.
Einstaklingurinn hafði kvartað til Persónuverndar annars vegar vegna afgreiðslu Íslandsbanka og Reiknistofu bankanna á beiðni hans um aðgang að persónuupplýsingum og hins vegar vegna uppflettinga í sjúkraskrá hans.
Persónuvernd ákvað að taka hvoruga kvörtunina til frekari rannsóknar þar sem stofnunin taldi þær ekki gefa nægar ástæður til þess. Samkvæmt lögum hefur Persónuvernd heimild til að meta hvort kvartanir sem henni berast gefi tilefni til rannsóknar.
Í fyrra málinu taldi Persónuvernd fyrirliggjandi gögn benda til þess að aðgangsbeiðni mannsins hefði að öllum líkindum verið afgreidd með lögmætum hætti. Í síðara málinu var honum meðal annars bent á að leita til persónuverndarfulltrúa Landspítala og óska eftir upplýsingum og skýringum á uppflettingum í sjúkraskrá sinni.
Umboðsmaður benti á að Persónuvernd hefði víðtækt svigrúm við mat á því hvort kvörtun gæfi tilefni til frekari rannsóknar. Athugun hans beindist því meðal annars að því hvort mat stofnunarinnar hefði byggst á málefnalegum sjónarmiðum og hvort fullnægjandi grundvöllur hefði verið lagður að ákvörðununum.
Niðurstaðan var að ekki væru forsendur til að telja mat Persónuverndar bersýnilega óforsvaranlegt eða í ósamræmi við lög.
Umboðsmaður benti þó manninum á að bera ný gögn, sem komið hefðu fram eftir fyrri ákvörðun Persónuverndar, undir stofnunina svo hún gæti metið hvort þau hefðu áhrif á niðurstöðu málsins.
Athugasemdir