Dagvöruvísitala ASÍ lækkaði um 0,11% milli ágúst og september 2026. Hægt hefur á verðhækkunum á matvöru síðustu mánuði eftir miklar hækkanir í upphafi árs. Frá ágúst 2025 til september 2026 hefur dagvöruverðsvísitalan hækkað um 3,4%. Helstu drifkraftar hækkunar á matvöru síðustu misseri eru hækkanir á kjötvöru, mjólk og ferskvöru.
Ávextir og grænmeti hækka mest á einu ári
Verð hækkaði í flestum dagvöruflokkum frá ágúst 2025 til september 2026. Mesta hækkunin mældist á grænmeti, sem hækkaði um 18% á tímabilinu þrátt fyrir nokkra lækkun yfir sumarmánuðina. Appelsínur og fleiri ferskir ávextir hækkuðu um 10,7% á tímabilinu. Ber hækkuðu um 5,6%, epli um 5,3% og bananar um 5,2%. Kál hækkaði um 3,7%, en kartöflur aðeins um 1%.
Sveiflurnar voru mun meiri í þessum vöruflokkum en í öðrum vöruflokkum. Það endurspeglar meðal annars að verð á ferskvöru getur tekið hröðum breytingum milli mánaða og eftir árstíðum.
Kjötvörur hækka almennt
Allir kjötvöruflokkarnir í samanburðinum hækkuðu í verði milli ára. Mest hækkaði lambakjöt, um 6,2%, og fuglakjöt um 5,7%. Unnið, reykt og saltað kjöt hækkaði um 4,9% og svínakjöt um 4,8%. Verðlagseftirlitið hefur áður vakið athygli á miklum verðhækkunum á kjötvörum. Þó að dregið hafi úr verðhækkunum eru þær áfram sá liður sem drífur áfram verðhækkanir á matvöru.
Nautakjöt hækkaði um 3,7% og annað nýtt eða frosið kjöt um 2,3%. Stærstur hluti hækkunarinnar kom fram á fyrstu mánuðum ársins 2026. Eftir vorið varð verðþróunin almennt stöðugri.
Mjólkurvörur hækka um 2–4%
Verð hækkaði einnig á öllum helstu mjólkurvörum. Ostar hækkuðu um 4,3% og smjör um 4,2%. Léttmjólk og undanrenna hækkuðu um 3,6%, súrmjólk, skyr og rjómi um 3,5% og jógúrt um 3%.
Nýmjólk hækkaði minnst mjólkurvara, um 2%. Verð hennar lækkaði nokkuð í september eftir hækkun fyrr á árinu.
Hóflegri breytingar á þurrvöru
Verð á þurrvöru hefur verið mun stöðugra. Brauð hefur hækkað um 2% frá því í ágúst í fyrra, pasta um 1,5% og flatbrauð, hrökkbrauð og kex um 1,1%. Sætabrauð og kökur hækkuðu um 1%.
Kornvörur voru eini flokkurinn sem lækkaði milli ára. Lækkunin nam um 0,5% og kom að mestu fram í september.
Niðurstöðurnar sýna að verðhækkanir dagvöru dreifast mjög ójafnt. Þótt breytingar séu litlar í mörgum þurrvöruflokkum hafa miklar hækkanir á ferskvöru, kjöti og mjólkurvörum sem vega þungt í vörukörfu flestra heimila mikil bein áhrif á útgjöld heimilanna til matarinnkaupa.
Um könnunina
Verð voru sótt úr nýjustu verðtöku ASÍ fyrir septembermánuð. Bornar eru saman sömu vörur milli mánaða. Hér er því aðeins um beinan verðsamanburð að ræða, en ekki er lagt mat á gæði eða þjónustu söluaðila. Í verðsamanburði er miðað við hilluverð sem neytandi hefur upplýsingar um í versluninni. Þegar skýrt er gefið til kynna að veittur sé afsláttur/tilboðsverð af merktu verði við kassa var skráð afsláttarverð.
Öll verð ásamt nýjustu verðum geta neytendur nálgast í Nappinu eða á verdlagseftirlit.is
Athugasemdir