Nokkuð var um umferðarlagabrot og fíkniefnamál hjá lögreglunni á höfuðborgarsvæðinu í dag. Meðal annars kom einstaklingur sjálfur á lögreglustöð og óskaði eftir að fíkniefni yrðu efnagreind þar sem hann óttaðist að honum hefðu verið seld léleg fíkniefni.
Heimsóknin til lögreglu hafði þó aðrar afleiðingar en viðkomandi kann að hafa gert ráð fyrir. Hann var kærður vegna gruns um vörslu og meðferð fíkniefna.
Tveir ökumenn voru jafnframt handteknir vegna gruns um akstur undir áhrifum fíkniefna. Annar þeirra reyndist sviptur ökuréttindum en hinn var ekki með gild ökuréttindi. Báðir voru látnir lausir að lokinni blóðsýnatöku.
Þá stöðvaði lögregla ökumann fyrir notkun farsíma við akstur og kom í ljós að hann var ekki með gild ökuréttindi. Annar ökumaður var einnig kærður fyrir farsímanotkun undir stýri.
Ökumaður sem blés undir refsimörkum vegna ölvunaraksturs var látinn hætta akstri. Þá var ökumaður kærður fyrir of hraðan akstur auk þess sem afturljós bifreiðarinnar voru ekki tendruð. Annar var kærður fyrir að vera með filmur í fremri hliðarrúðum bifreiðar.
Í miðborg Reykjavíkur var tilkynnt um ölvaðan mann sem hafði dottið á vinnusvæði. Lögregla ræddi við manninn á vettvangi.
Einnig var tilkynnt um umferðaróhapp tveggja bifreiða en ekki var talið að slys hefðu orðið á fólki. Þá barst tilkynning um olíu á vegi. Slökkvilið höfuðborgarsvæðisins hreinsaði olíuna upp og lögregla sinnti umferðarstjórn á meðan.
Athugasemdir