Nokkuð var um útköll hjá lögreglunni á höfuðborgarsvæðinu í gærkvöldi og í nótt. Meðal verkefna voru innbrot, þjófnaðir, fíkniefnaakstur og útköll vegna ölvaðra einstaklinga.
Lögreglu barst meðal annars óvenjuleg tilkynning frá manni sem hringdi frá heimili sínu og greindi frá því að tveir menn hefðu stungið höfðinu inn um glugga hjá dóttur hans. Lögreglumenn voru sendir á vettvang vegna málsins.
Tilkynnt var um innbrot og þjófnað í heimahúsi og fór lögregla á vettvang. Málið er nú til rannsóknar.
Þá hafði lögregla afskipti af ökumanni sem framvísaði erlendu ökuskírteini. Í ljós kom að ökuskírteinið var falsað. Annar ökumaður var handtekinn grunaður um akstur undir áhrifum fíkniefna. Hann var látinn laus að lokinni blóðsýnatöku.
Lögregla var einnig kölluð á hótel þar sem ölvaður einstaklingur var sagður vera til vandræða. Lögreglumenn mættu á staðinn og vísuðu viðkomandi út.
Tilkynningar bárust um þjófnaði í matvöruverslunum og voru þau mál afgreidd með vettvangsskýrslum. Þá var óskað eftir aðstoð lögreglu vegna ágreinings í tengslum við bílakaup.
Ungmenni voru sögð vera til vandræða í strætisvagni og ræddi lögregla við þau. Einnig var kvartað undan hávaða í heimahúsi og var húsráðandi beðinn um að lækka í tónlist eða öðrum hávaða.
Að lokum barst tilkynning um mann sem virtist vera að reyna að komast inn í bifreiðar. Lögregla hafði uppi á honum en hann sagðist hafa talið að vinur sinn ætti eina bifreiðina og að hann hefði aðeins verið að kanna hvort hún væri ólæst.
Athugasemdir