Reykjavíkurborg hefur auglýst tvær tillögur að breytingum á deiliskipulagi í borginni. Annars vegar er gert ráð fyrir að heimilt verði að byggja hótel við Grensásveg 1 og hins vegar að ný lóð verði afmörkuð fyrir farsímastaur í Norðlingaholti.
Umhverfis og skipulagsráð samþykkti þann 23. september að auglýsa breytingu á deiliskipulagi Skeifunnar og Fenjanna vegna lóðarinnar að Grensásvegi 1. Borgarráð samþykkti síðan auglýsingu tillögunnar 1. október.
Samkvæmt breytingunni verður heimilt að byggja hótel á svokölluðum reitum B og D á lóðinni. Hámarksstærð hótelsins mun miðast við þann hámarksfjölda fermetra sem heimilt er að byggja á reitunum samkvæmt skipulaginu.
Ekki kemur fram í auglýsingunni hversu mörg herbergi yrðu í fyrirhuguðu hóteli eða hvenær framkvæmdir gætu hafist.
Farsímastaur í Norðlingaholti
Samhliða þessu hefur borgin auglýst breytingu á deiliskipulagi Norðlingaholts. Þar er fyrirhugað að afmarka nýja innviðalóð fyrir farsímastaur.
Lóðin verður innan opins svæðis, OP30, í Norðlingaholti og verður aðkoma að henni frá Bugðu. Umhverfis og skipulagsráð samþykkti að auglýsa breytinguna 16. september og borgarráð staðfesti þá ákvörðun 1. október.
Báðar skipulagstillögurnar verða til kynningar í Skipulagsgáttinni frá 8. október til og með 19. nóvember. Þeir sem telja sig eiga hagsmuna að gæta geta komið á framfæri ábendingum og athugasemdum til og með 19. nóvember.
Athugasemdir