Carla Jade hélt Misfits-meistaratitli sínum eftir nauman sigur á íslensku hnefaleikakonunni Eriku Nótt Einarsdóttur í Lundúnum í kvöld. Hin 19 ára Erika byrjaði betur og vann fyrstu tvær umferðirnar að mati lýsenda bardagans, en Carla sótti í sig veðrið og hafði betur í síðustu þremur. Erika var afar ósátt við niðurstöðuna og ýtti við Cörlu þegar hún fagnaði sigrinum.
Erika Nótt Einarsdóttir þurfti að sætta sig við naumt tap í frumraun sinni hjá Misfits Boxing þegar hún mætti ríkjandi léttvigtarmeistaranum Carla Jade í Copper Box Arena í Lundúnum.
Bardaginn var jafn og spennandi. Erika byrjaði af krafti og hafði betur í fyrstu tveimur umferðunum, en Carla náði að snúa taflinu við og var sterkari í síðustu þremur. Það dugði henni til að tryggja sér nauman sigur og halda meistaratitlinum.
Ljóst var að Erika var ekki sátt við niðurstöðuna. Þegar Carla fagnaði sigrinum og titlinum hrópaði Erika „aldrei!“ og ýtti við henni. Fyrir bardagann höfðu þær báðar látið stór orð falla en Carla kastaði meðal annars dós í átt að Eriku á blaðamannafundi í fyrradag.
Viðbrögð Eriku settu enn meiri dramatík í lok bardagans, sem hafði verið jafn og tvísýnn allt til loka.
Lengi beðið eftir tækifærinu
Erika hefur lengi stefnt að því að komast í atvinnubardaga og tryggði sér sæti hjá Misfits Boxing eftir að hafa vakið athygli á samfélagsmiðlum og í hlaðvörpum.
Hún varð Norðurlandameistari í hnefaleikum árið 2024, fyrst Íslendinga, og tilkynnti skömmu síðar að hún hygðist halda út í atvinnumennskuna eftir sigur á Icebox.
Andstæðingur hennar, Carla Jade, er 37 ára gömul og hefur verið viðloðandi bardagasenuna um árabil. Hún starfaði áður sem hringstelpa og stofnaði síðar fyrirtækið Ring Girl Promotion. Hún er fjögurra barna móðir og hafði fyrir bardagann varið Misfits-meistaratitil sinn í léttvigt þrisvar sinnum.
Þrátt fyrir tapið sýndi Erika að hún getur veitt reynslumiklum andstæðingum harða keppni. Naumur sigur Cörlu og viðbrögð Eriku eftir að úrslitin lágu fyrir munu án efa vekja áfram umræðu meðal fylgjenda beggja keppenda.
Athugasemdir