Atli Þór Fanndal Guðlaugsson, verkefnastjóri á skrifstofu rektors við Háskólann á Bifröst, gagnrýnir í Facebook-færslu það sem hann telur vera tilraun Breiðfylkingarinnar (Starfsgreinasambandið, Efling, Samiðn og Byggiðn) til að gera lítið úr samkomulagi VR við Samtök atvinnulífsins en stéttarfélagið náði samkomulagi um framlengingu kjarasamninga á síðustu stundu á dögunum. Hann spyr hver tilgangurinn sé með því að halda áfram deilum eftir að samningar hafa náðst.
Atli Þór segist eiga erfitt með að skilja hvers vegna Breiðfylkingin leggi svo mikla áherslu á að sannfæra fólk um að samkomulag VR hafi í raun verið leikrit og að samningarnir hafi ekki falið í sér neinar verulegar umbætur. „En samt er það víst þannig að hálaunafólkið í VR er alveg ferlega glatað fólk að hafa í samfloti,“ skrifar Atli Þór og bætir við:
„Til hvers að standa í þessu? Samkomulag náðist. Það þarf að kunna að lifa á friðartímum“.
Spyr hver sigurinn eigi að vera
Atli Þór veltir því fyrir sér hvernig sigur eigi að líta út í deilunni og hvað sé í raun verið að berjast fyrir. Að hans mati náðu stéttarfélögin góðu samkomulagi miðað við aðstæður og aðgerðarpakki ríkisstjórnarinnar líti vel út.
Næsta verkefni sé að tryggja að staðið verði við það sem samið var um.
„Hvernig á sigur eiginlega að líta út í þessu stríði um hvað?“ spyr hann í færslunni.
Hann segir samningana sjálfa vera afrek sem allir geti átt hlutdeild í og kallar eftir skýringu á því hvað fáist með því að halda áfram að draga samkomulagið í efa.
Atli Þór tekur þó fram að hann sé opinn fyrir því að hann skilji einfaldlega ekki málið til fulls. Hugsanlega hafi eitthvað ekki náðst fram vegna samkomulagsins, en hann sjái ekki tilganginn með þeirri gagnrýni sem hann lýsir í færslunni.
„Kannski er eitthvað sem ekki fékkst vegna þessa en er raunverulega skil ekki tilganginn“.
Margrét Tryggvadóttir, rithöfundur og fyrrverandi þingkona, er meðal þeirra sem skrifar athugasemd við færslu Atla Þórs og bendir á ákveðna staðreynd:
„Þetta er sama fólkið og vill alls ekki að neinn sjái hvernig samningur við ESB liti út.“
Athugasemdir