Alls voru 86 mál skráð í kerfi lögreglunnar á höfuðborgarsvæðinu frá klukkan 17 í gær og þar til dagbókin var rituð. Átta einstaklingar dvöldu þá í fangaklefa.
Nokkuð var um alvarleg umferðarlagabrot. Ungur ökumaður var stöðvaður á Suðurlandsvegi eftir að hafa mælst á 151 kílómetra hraða á klukkustund þar sem hámarkshraði er 90. Hann á von á eins mánaðar sviptingu ökuréttinda.
Í Kópavogi sinnti ökumaður ekki stöðvunarmerkjum lögreglu og hófst eftirför. Maðurinn ók langt yfir leyfilegum hámarkshraða og gegn rauðu ljósi. Þegar hann stöðvaði bifreiðina reyndi hann að flýja á fæti en lögreglumenn náðu honum fljótlega. Hann er grunaður um akstur undir áhrifum vímuefna auk sölu og dreifingar fíkniefna. Maðurinn var handtekinn og vistaður í fangageymslu.
Flúði eftir umferðarslys
Tilkynnt var um umferðarslys í Hafnarfirði þar sem ökumaður sem talinn er hafa valdið slysinu yfirgaf vettvang. Lögregla hóf leit að bifreið hans og fannst hún síðar í Garðabæ. Ökumaðurinn var þá farinn og búið var að fjarlægja skráningarmerki bifreiðarinnar. Málið er til rannsóknar.
Önnur eftirför varð í Fossvogi þegar ökumaður sinnti ekki stöðvunarmerkjum lögreglu. Þegar bifreiðin stöðvaðist reyndi maðurinn að hlaupa undan en var handtekinn eftir stuttan eltingarleik. Hann er grunaður um ölvunarakstur.
Átta aðrir ökumenn voru jafnframt handteknir víðs vegar um höfuðborgarsvæðið vegna gruns um akstur undir áhrifum áfengis eða fíkniefna. Samkvæmt lögreglu virtu þeir allir að vettugi stöðvunarmerki hennar.
Réðst á lögreglumenn
Lögreglumenn höfðu einnig afskipti af ölvuðum einstaklingi vegna líkamsárásar í miðborg Reykjavíkur. Maðurinn brást illa við afskiptunum og réðst að lögreglumönnum með höggum og spörkum.
Hann var handtekinn og vistaður í fangaklefa. Við leit á manninum fannst töluvert magn efna sem grunur leikur á að séu fíkniefni.
Athugasemdir