Ökumaður var handtekinn eftir stutta eftirför lögreglu en hann hafði upphaflega verið stöðvaður vegna gruns um notkun farsíma undir stýri.
Samkvæmt upplýsingum lögreglu fór ökumaðurinn út úr bifreið sinni eftir að hafa verið stöðvaður en var beðinn um að fara aftur inn í hana. Í kjölfarið ók hann af stað áður en lögreglumönnum tókst að ræða við hann.
Lögregla hóf eftirför sem varð þó skammvinn. Ökumaðurinn stöðvaði bifreiðina, hljóp á brott en lögreglumenn náðu honum skömmu síðar og handtóku.
Maðurinn er grunaður um að hafa ekki farið að fyrirmælum lögreglu, akstur undir áhrifum fíkniefna, brot á vopnalögum og vörslu fíkniefna. Hann var vistaður í fangaklefa vegna rannsóknar málsins.
Í öðrum verkefnum lögreglu var tilkynnt um þakkant sem var að losna af húsi. Lögregla fór á vettvang og kallaði eftir viðeigandi aðstoð til að tryggja aðstæður.
Þá var óskað eftir aðstoð eftir að grjóti var kastað inn um glugga á heimili. Málið er til rannsóknar.
Lögreglu barst einnig tilkynning um hóp ungmenna sem átti að hafa sett einstakling í skott bifreiðar gegn vilja hans. Þegar lögregla kannaði málið kom í ljós að um grín hafði verið að ræða.
Tveir ökumenn voru jafnframt handteknir, grunaðir um akstur undir áhrifum fíkniefna. Þeir voru sviptir ökuréttindum og látnir lausir að lokinni blóðsýnatöku.
Loks sinntu lögregla og sjúkralið útkalli vegna bílveltu. Ökumaður bifreiðarinnar var kominn út úr henni þegar viðbragðsaðilar komu á vettvang. Hann hlaut minniháttar meiðsli og var fluttur á bráðamóttöku til frekari aðhlynningar.
Athugasemdir