Bandaríski leikarinn Jason Alexander, sem er þekktastur fyrir hlutverk George Costanza í sjónvarpsþáttunum Seinfeld, rifjaði nýlega upp hvernig tíu palestínskir menn vernduðu hann í hernaðaraðgerð Ísraelsmanna í Ramallah á Vesturbakkanum. Hann segir reynsluna hafa sýnt sér styrk palestínskrar gestrisni og samstöðu.
Alexander sagði frá atvikinu í hlaðvarpinu Build or Break, þar sem hann ræddi við frumkvöðulinn Daniel Lubetzky. Hann heimsótti hernumda Vesturbakkann árið 2004 í tengslum við friðarverkefnið OneVoice, sem miðaði að því að hvetja Ísraela og Palestínumenn til að styðja samningaviðræður um tveggja ríkja lausn.
Í heimsókninni ræddi Alexander við palestínskan mann að nafni Mohammed og spurði hann hvort hann, sem amerískur gyðingur væri öruggur í Palestínu. Maðurinn útskýrði fyrir honum mikilvægi þess í íslam að vernda gest sem hefði verið boðið heim.
„Mesta vanvirða sem trúaður múslimi getur sýnt er að leyfa gesti, sem honum hefur verið boðið, að verða fyrir skaða,“ sagði Mohammed, samkvæmt frásögn Alexanders.
Mohammed bætti við að gestgjafar leikarans væru tilbúnir að leggja líf sitt í hættu til að vernda hann.
„Jason, ef þess þyrfti, myndu þeir stökkva fyrir byssukúlu fyrir þig,“ sagði hann.
Alexander sagðist hafa áttað sig á alvöru orðanna þegar tíu palestínskir menn söfnuðust í kringum hann eftir að skothvellir heyrðust í miðri hernaðaraðgerð Ísraelsmanna.
„Ég man að þessir tíu menn við borðið umkringdu mig. Ég hugsaði: „Guð minn góður, hann var ekki að grínast. Þeir ætla ekki að leyfa að mér verði gert mein,““ sagði leikarinn.
Ólík afstaða fyrrverandi meðleikara
Frásögn Alexanders hefur einnig vakið athygli vegna opinbers stuðnings hans við Ísrael á fyrri árum. Hann tók meðal annars þátt í fjáröflun fyrir samtökin Friends of the Israel Defense Forces (FIDF), sem styðja ísraelska hermenn. Árið 2012 var hann kynnir á fjáröflunarkvöldi samtakanna í Los Angeles, þar sem meira en 14 milljónum Bandaríkjadala var safnað til stuðnings hermönnum og velferðar- og menntaverkefnum.
Sagan hefur jafnframt beint sjónum að ólíkri afstöðu Alexanders og fyrrverandi meðleikara hans úr Seinfeld, Jerry Seinfeld.
Seinfeld hefur lýst yfir opinberum stuðningi við Ísrael í stríðinu á Gaza. Í október 2026 brást hann háðslega við mótmælendum sem gagnrýndu Ísrael á skemmtun hans í Chicago. Þar sagði hann meðal annars: „Ég er rasisti, þetta eru þjóðarmorð og ég er styð það,“ áður en hann dansaði á sviðinu. Hann sagði einnig einum mótmælanda að hann myndi senda andivirði miða hans til Ísraels.
Frásögn Alexanders snýst hins vegar um persónulega reynslu hans af Palestínumönnum og þá vernd sem hann segir þá hafa veitt sér. Í viðtali við The Forward árið 2004 lýsti hann einnig hlýlegum viðtökum Palestínumanna og sagði að bein samskipti við íbúa Ramallah hefðu breytt fyrirframgefnum hugmyndum hans um borgina.
Athugasemdir