Írski leikarinn Barry Keoghan, sem meðal annars er þekktur fyrir hlutverk sitt í kvikmyndinni Saltburn, hefur greint frá því að hann hafi farið í tvær meðferðir til að þétta húðina. Þetta kemur tæpum sjö mánuðum eftir að hann sagði frá því hvernig neikvæð ummæli og einelti á netinu vegna útlits síns hefðu haft áhrif á hann.
Keoghan fór í svokallaða XERF-húðmeðferð, sem er snyrtiaðgerð án nála og byggist á útvarpstíðni til að lyfta húðinni og þétta hana.
„Ég hef heyrt mikið um þetta,“ sagði Keoghan í myndskeiði sem birt var á Instagram 23. október á reikningi Nilam Holmes, eiganda snyrtistofunnar Dermaspa.
„Í hvert skipti sem ég kem hingað finnst mér þetta mjög afslappandi og græðandi. Nilam hugsar vel um húðina á mér,“ bætti hann við.
Leikarinn segist afar ánægður með árangurinn og segir meðferðina hafa aukið sjálfstraust sitt. Í september kostaði hver meðferð um 3.300 dollara, eða sem samsvarar um 404.000 kr, á stofunni.
„Mér líður betur með sjálfan mig. Ég lít betur út. Ég held að það sé mikilvægt að hugsa vel um sjálfan sig, bæði að innan og utan,“ sagði leikarinn, sem fer einnig með hlutverk í kvikmyndinni Peaky Blinders: The Immortal Man.
Holmes, sem stofnaði læknisfræðilegu snyrtistofu sína í Bretlandi árið 2008, sagði að hún hefði unnið með Keoghan um nokkurt skeið og sinnt húð hans samhliða annasömu starfi hans við kvikmyndir, auglýsingaherferðir og önnur verkefni.
„Ég hef unnið með Barry um tíma og sinnt húðinni hans í tengslum við mismunandi kvikmyndir, auglýsingaherferðir og verkefni. Það traust sem hann sýnir mér skiptir mig miklu máli,“ skrifaði hún við myndskeiðið. „Húðin hans hefur batnað mikið á undanförnum árum og hann lítur frábærlega út.“
Netníð hefur haft áhrif á sjálfstraust leikarans
Þótt Keoghan sé ánægður með árangur meðferðarinnar hefur hann áður sagt frá því hversu mikið neikvæð ummæli um útlit hans hafi tekið á hann.
Í viðtali við SiriusXM í mars sagðist hann hafa reynt að halda sig frá samfélagsmiðlum en ætti erfitt með að standast freistinguna að kanna viðbrögð við sér eftir opinberar framkomur.
„Ég hef fjarlægt mig af netinu, en ég er samt forvitinn maður sem vill skoða hvernig fólk hefur brugðist við ef ég mæti á viðburð eða fer eitthvað,“ sagði hann.
„Og það er ekkert skemmtilegt. Það er mikið hatur á netinu. Það er mikið um ofbeldisfull og niðrandi ummæli um útlit mitt.“
Keoghan segir stöðuga gagnrýni hafa orðið til þess að hann dragi sig í hlé frá opinberu lífi.
„Þetta hefur fengið mig til að loka mig af og vilja ekki mæta á staði eða fara út. Þetta er farið að verða vandamál. Ég þarf ekki að fela mig, því ég er nú þegar að fela mig. Ég þarf ekki að fara á staði, því ég fer í raun ekki á staði vegna þessa,“ sagði hann.
Óttast áhrifin á son sinn
Keoghan á fjögurra ára son, Brando, með fyrrverandi sambýliskonu sinni, Alyson Sandro. Leikarinn hefur sagt að netníðið valdi sér enn meiri áhyggjum þegar hann hugsar til þess að sonur hans gæti síðar lesið ummælin.
„Þetta veldur aðdáendum vonbrigðum,“ sagði Keoghan, sem hefur verið tilnefndur til Óskarsverðlauna. „En það veldur mér líka vonbrigðum að litli drengurinn minn þurfi að lesa allt þetta þegar hann verður eldri.“
Athugasemdir