Leikkonan Barbara Barrie, sem tilnefnd var til Óskarsverðlauna og varð mörgum kunn fyrir hlutverk sín í kvikmyndum og sjónvarpsþáttum, er látin, 95 ára að aldri. Hún lést með aðstoð heilbrigðisstarfsfólks
„Fyrir hönd Harnick-fjölskyldunnar get ég staðfest að andlát hennar var með læknisaðstoð í samræmi við lög New York-ríkis um dánaraðstoð, sem hún studdi og talaði fyrir,“ sagði talsmaður Barrie í yfirlýsingu til E! News.
Barrie þáði lífslokameðferð á heimili sínu á Manhattan eftir að hafa greinst með ólæknandi krabbamein, að því er The New York Times greinir frá.
Leikkonan kom fram í fjölda sjónvarpsþátta, meðal annars Nurse Jackie og Law & Order: SVU. Áhrif hennar á leiklistina náðu þó langt út fyrir sjónvarpsskjáinn.
Barrie var tilnefnd til Óskarsverðlauna fyrir leik sinn í kvikmyndinni Breaking Away frá árinu 1979. Nær áratug áður hafði hún einnig hlotið tilnefningu til Tony-verðlauna fyrir frammistöðu sína í upprunalegri uppfærslu söngleiksins Company eftir Stephen Sondheim.
Starfaði við leiklist í meira en 55 ár
Barrie fæddist í Chicago og var gift leikstjóranum Jay Malcolm Harnick þar til hann lést árið 2007. Þau eignuðust tvö börn, Jane, sem er 61 árs, og Aaron, sem er 57 ára.
Hún kynntist leiklistinni um 11 ára aldur þegar hún tók þátt í starfi áhugaleikhúss í heimabyggð sinni. Hún starfaði við fagið í meira en 55 ár.
Í viðtali í þættinum How Art Changed Me á PBS árið 2024 lýsti hún því hvernig hún nálgaðist leiklistina.
„Þú fjarlægir allt, þú fjarlægir óþarfa hlutina, þú fjarlægir allt skapferlið. Þá einbeitirðu þér einfaldlega að manneskjunni sem þú ert að leika. Það er allt sem þú þarft að gera, en það tekur mörg ár að læra það,“ sagði Barrie.
Hún hlaut einnig verðlaun sem besta leikkona á kvikmyndahátíðinni í Cannes og lék á ferlinum með þekktum leikurum á borð við James Dean.
Þrátt fyrir farsælan feril sagði Barrie að hún hefði alltaf þurft að samræma leiklistina fjölskyldulífinu.
„Nánast allan minn starfsferil var ég gift og átti börn sem þurfti að annast. Ef hlutverk bauðst sem mig langaði til að leika, þá tók ég það að mér,“ sagði hún.
Athugasemdir