Héraðsdómur Reykjavíkur hefur viðurkennt skaðabótaskyldu Sjóvár vegna vinnuslyss sem starfsmaður útgerðarfélagsins Vísis varð fyrir í mars árið 2023. Maðurinn slasaðist þegar hann féll við vinnu við sprautusöltunarvél í vinnslusal fyrirtækisins en dómurinn var birtur fyrr í október.
Starfsmaðurinn hafði starfað við saltfisksvinnslu hjá Vísi um árabil. Hann var að stíga niður af palli við vélina þegar hann féll og slasaðist. Í kjölfarið var hann fluttur með sjúkrabíl á sjúkrahús þar sem hann greindist með hásinarslit. Síðar voru varanlegar afleiðingar slyssins metnar til fimm stiga miska.
Maðurinn taldi slysið mega rekja til ófullnægjandi öryggisaðstæðna. Hann hélt því meðal annars fram að þrepið hefði verið sleipt vegna slors og bleytu og að handrið hefði vantað. Sjóvá hafnaði hins vegar bótaskyldu og taldi ósannað að slysið mætti rekja til saknæmrar háttsemi vinnuveitandans.
Dómurinn taldi að tveggja þrepa trappan sem maðurinn notaði hefði ekki verið eins og best yrði á kosið. Efra þrepið var talið afar þröngt og neðra þrepið styttra, þannig að mögulegt var að stíga fram hjá því. Handrið hafði jafnframt verið sett upp eftir slysið.
Niðurstaða dómsins var að aðstæður við tröppuna hefðu falið í sér annmarka sem jafna mætti til gáleysis af hálfu vinnuveitandans. Sjóvá var því talið bótaskylt úr ábyrgðartryggingu Vísis vegna líkamstjóns mannsins.
Sjóvá var jafnframt gert að greiða rúmar 2,3 milljónir króna í málskostnað, sem rennur til ríkissjóðs.
Athugasemdir