Mexíkóskur sjónvarpsmaður sparkaði dróna í andlit konu í beinni útsendingu á dögunum með þeim afleiðingum að hún þurfti að yfirgefa myndverið og leita læknisaðstoðar.
Atvikið átti sér stað 26. október í skemmtiþættinum Es Show, sem sýndur er á Canal 6 í Monterrey í Mexíkó.
Myndskeið af atvikinu hefur vakið mikla athygli á samfélagsmiðlum. Þar sést þáttastjórnandinn Ernesto Chavana standa í myndverinu þegar lítill dróni sveimar nærri honum. Chavana virðist pirrast á drónanum og sparkar í hann.
Sparkið varð hins vegar til þess að dróninn þeyttist upp í loftið og beint í andlit kólumbísku fyrirsætunnar og dansarans Isabellu Rojas, sem er þekkt í þættinum undir nafninu La Colombiana.
Rojas beygði sig samstundis niður af sársauka og aðrir í myndverinu komu henni til aðstoðar. Hún þurfti í kjölfarið að yfirgefa útsendinguna tímabundið til að fá læknisaðstoð.
Chavana sætti harðri gagnrýni eftir atvikið, ekki síst fyrir viðbrögð sín strax í kjölfarið. Fjölmargir á samfélagsmiðlum gagnrýndu hann fyrir að hafa ekki þegar í stað beðið Rojas afsökunar eða komið henni til aðstoðar.
Hann baðst síðar opinberlega afsökunar og sagðist taka fulla ábyrgð á því sem gerðist.
Rojas sneri aftur í þáttinn eftir að hafa fengið aðhlynningu. Meiðsli hennar reyndust samkvæmt fjölmiðlum minniháttar. Hún sýndi síðar fylgjendum sínum á samfélagsmiðlum skurð á vör sem hún hlaut þegar dróninn skall á andliti hennar.
Athugasemdir