Hildur sökuð um að fara rangt með staðreyndir

Kári Sig­urðs­son, for­maður Sameykis, og Sonja Ýr Þor­bergs­dóttir, for­maður BSRB, gagn­rýna harð­lega mál­flutn­ing Hildar Björns­dóttur borg­ar­stjóra um upp­sagnir og hag­ræð­ing­ar­að­gerðir Reykja­vík­ur­borgar. Þau segja fjöl­margar stað­hæf­ingar hennar ekki stand­ast skoðun.

Þetta kemur fram í grein þeirra sem birt­ist í dag á Vísi. Þar fjalla þau meðal ann­ars um þrjár upp­sagn­ar­hrinur hjá borg­inni sem sagðar eru fela í sér nið­ur­lagn­ingu 130 stöðu­gilda.

Þau benda á að Hildur hafi sagt að hvergi hafi verið bakkað með upp­sagn­irnar og staðið hafi verið við þær upp­sagnir sem stefnt var að. Kári og Sonja segja það ekki rétt og vísa til upp­lýs­inga frá mannauðs­sviði borg­ar­innar um að sjö ein­stak­lingum hafi verið boðið starf sitt aftur þótt það hafi ekki verið ráð­gert þegar þeim var sagt upp.

Þau gagn­rýna einnig mark­mið borg­ar­innar um að hlut­fall stöðu­gilda í mið­lægri þjón­ustu verði 7,5 pró­sent. Segja þau hlut­fallið póli­tískt við­mið en ekki fræði­legan mæli­kvarða. Vísa þau meðal ann­ars til norskrar rann­sóknar á 300 sveit­ar­fé­lögum þar sem starfs­fólk í stjórn­sýslu var að með­al­tali 13,3 pró­sent af heild­ar­fjölda starfs­fólks.

Ummæli Hildar um veik­inda­fjar­vistir og mögu­lega mis­notkun veik­inda­réttar sæta einnig harðri gagn­rýni. Samkvæmt tölum sem þau vísa til var veik­inda­hlut­fall á síð­asta ári um 7,3 pró­sent á Land­spít­ala og í Hafn­ar­firði, ríf­lega sjö pró­sent í Reykja­vík og Kópavogi og tæp­lega 5,9 pró­sent á Sel­tjarn­ar­nesi.

„Stað­hæf­ing um að fólk sé að mis­nota rétt sinn til veik­inda­launa án nokk­urra gagna eða þekk­ingar sem renna stoðum undir hana er alvar­leg,“ skrifa þau.

Þau draga jafn­framt í efa að nægi­legar grein­ingar liggi að baki upp­sögn­unum. Rúmlega hund­rað dögum eftir fyrstu upp­sagnir hafi borgin ekki svarað helm­ingi beiðna Sameykis um rök­stuðn­ing né afhent grein­ingar eða gögn um und­ir­bún­ing þeirra.

Reykja­vík­ur­borg hefur sagt að nið­ur­lagn­ing 130 stöðu­gilda skili um 2,3 millj­arða króna hag­ræð­ingu á árs­grund­velli. Kári og Sonja telja óljóst hvort tekið hafi verið til­lit til kostn­aðar sem geti komið á móti, meðal ann­ars vegna yfir­vinnu og útvist­unar verk­efna.

Þau hafna jafn­framt þeirri full­yrð­ingu að borg­ar­búar muni ekki finna fyrir breyt­ing­unum. Minni stoð­þjón­usta geti að þeirra mati aukið álag á fram­línu­starfs­fólk, lengt bið­tíma og haft áhrif á gæði þjón­ust­unnar.

„Það eru ansi kaldar kveðjur að gera meinta mis­notkun á veik­inda­rétti að umræðu­efni við þessar aðstæður,“ skrifa Kári og Sonja.

Þau segja Hildi ekki hafa lagt fram gögn sem sýni með skýrum hætti hver áhrif fækk­unar starfs­fólks verði eða hverjir taki við verk­efnum þeirra sem missa störfin.