Aníta Briem, ein fjölhæfasta leikkona Íslands, hefur verið dugleg að leika í bæði íslenskum kvikmyndum og þáttum sem og alþjóðlegum stórmyndum. Hún hefur heillað áhorfendur með sinni miklu útgeislun en nú opnar hún sig um sitt persónulega líf í hlaðvarpsþættinum sem heitir: Fullorðins! Hlaðvarpið er í umsjón Kiddu, þar sem rætt er um allt sem telst til „fullorðins“ eins og þau lýsa þættinum.
Aníta ræðir í þættinum hvernig það hafi verið að vinna erlendis og það sem fjölmiðlar hafa haft mestan áhuga á upp á síðkastið, að hún sé í sambandi með yngri manni.
„Ég var að vinna að seríu fyrir Warner Brothers og ABC þegar ég fékk símtal frá umboðsmanni mínum. Stúdíóið hafði frétt að ég væri að sofa hjá einum meðleikaranum og krafðist þess að því yrði hætt. Þetta var alls ekki satt.“
Anítu brá við vegna þess að hún segir að þessar sögusagnir hafi ekki verið réttar. „Þetta var ekki satt, en þetta er áhugavert. Guð minn góður, hvað hef ég verið að gera? En karlmennirnir, mínir kollegar, þeir voru að gera alls konar og maður veltir því fyrir sér hvort að þeir hafi verið að fá þessi símtöl.“
Í viðtalinu ræðir hún opinskátt um ástarsamband sitt og segir að það komi alveg reglulega fyrir að það sé rætt í fjölmiðlum. Þá hefur verið sagt, „hún er „cougar“ eða Aníta hamingjusöm með yngri manni.“ Hún hlær að þessu og bætir við að „hann sé ein stærsta gjöf sem ég hef fengið í lífinu mínu. Hafþór er með stærsta hjarta og hann er svo yndislegur og okkur líður svo vel.“
Aníta sýndi snemma mikinn metnað og fluttist aðeins 16 ára gömul til Lundúna til að elta drauminn. Hún útskrifaðist úr hinum virta listaháskóla Royal Academy of Dramatic Art (RADA) skóla sem aðeins þeir allra hæfustu komast inn í.
Í kjölfarið fylgdu stór hlutverk á alþjóðavettvangi, Jane Seymour í The Tudors þar sem hún fór með hlutverk þriðju eiginkonu Hinriks áttunda og heillaði milljónir áhorfenda með tignarlegri og tilfinningaríkri frammistöðu. Einnig lék hún stórt hlutverk sem Hannah Ásgeirsson í Journey to the Center of the Earth þar sem hún lék aðalhlutverkið á móti Brendan Fraser.
Eftir að hafa búið og starfað í Los Angeles í mörg ár sneri Aníta aftur á heimaslóðir. Hún hefur tekið að sér dramatísk hlutverk á borð við kvikmyndina Svar við bréfi Helgu og þættina Ráðherrann og svo hefur hún einnig stigið fram sem sögumaður og handritshöfundur.
