Morgunþátturinn Bítið á Bylgjunni tók sérdeilis magnað viðtal við Baldvin Þorsteinsson, nýráðinn forstjóra Samherja, skömmu áður en jólahátíðin gekk í garð. Sigmar Vilhjálmsson og Lilja Katrín Gunnarsdóttir tóku viðtalið við Baldvin sem er að fóta sig í nýju starfi sem forstjóri eftir að faðir hans, Þorsteinn Már Baldvinsson, afhenti honum konungsdæmið í formi fyrirframgreidds arfs og síðan hásætið sem forstjóra. 

Viðtalið var einkar hugljúft og leiddi í ljós að ekki fara endilega saman gæfa og gjörvileiki. Baldvin viknaði reglulega við þegar hann ræddi meinleg örlög föður síns sem sætir rannsókn vegna stórfellds mútumáls í Namibíu og hefur þess utan verið rannsakaður á Íslandi og í Færeyjum um langt árabil. 

Ungi auðmaðurinn gat staðfest að faðir hans væri síður en svo afbrotamaður. Sigmar og Lilja sýndu honum mikla hluttekningu og vöruðust að vera með spurningar sem gætu kallað fram enn meiri og átakanlegri depurð hjá erfingjanum unga sem var í viðtalinu með allt öðrum brag heldur en þegar hann undir suðandi sjónvarpstökuvélum hreytti ónotum í Má Guðmundsson seðlabankastjóra fyrir að hafa staðið fyrir rannsókn á Samherja og pabba gamla. Nú er hann hinn auðmjúkasti og beygir reglulega af. Enn liggur ekki fyrir hvort Samherjamenn verði ákærðir á Íslandi fyrir brall sitt í Namibíu ...