Í yfirlýsingu sem Marta Guðjónsdóttir og Kjartan Magnússon, borgarfulltrúar Sjálfstæðisflokksins hafa sent frá sér greina þau frá því að þau hafi yfirgefið Sjálfstæðisflokkinn og hafi gengið til liðs við Miðflokkinn.
Í yfirlýsingunni segja borgarfulltrúarnir helstu ástæðuna vera afstaða flokksins gagnvart Borgarlínunni en tekist hefur verið harðlega innan flokksins á undanförnum árum um hana.
Yfirlýsingin
Við undirrituð höfum ákveðið að segja skilið við Sjálfstæðisflokkinn og ganga til liðs við Miðflokkinn. Ástæðan er sú að við teljum Miðflokkinn mun líklegri en Sjálfstæðisflokkinn til að vinna að meginmarkmiðum okkar í borgarmálum.
Á þetta ekki síst við um samgöngumál. Svokölluð borgarlína hefur verið eitt helsta áherslumál vinstri flokkanna á undanförnum árum undir forystu Samfylkingarinnar. Hins vegar hefur verið kvartað yfir því að stefna Sjálfstæðisflokksins í málinu sé í besta falli óljós.
Borgarlínan yrði risavaxin opinber framkvæmd, sem hefði ýmsar neikvæðar afleiðingar í för með sér vegna mikils kostnaðar, skattahækkana og aukinna umferðartafa. Hægt væri að stórefla núverandi strætisvagnakerfi með margfalt minna fé en fyrirhugað er að setja í borgarlínuverkefnið. Slíkar umbætur á strætókerfinu er hægt að ráðast í strax í stað þess að bíða í a.m.k. hálfan áratug eftir rándýrri og ófjármagnaðri borgarlínu.
Kostnaður vegna framkvæmdahluta borgarlínu mun sennilega nema hundruðum milljarða króna. Slík risaframkvæmd verður ekki fjármögnuð nema með auknum álögum á borgarbúa. Meðal annars á að fjármagna verkefnið með umferðargjaldi er koma á til viðbótar háum gjöldum, sem þegar eru innheimt af umferð. Slíkar viðbótarálögur munu líklega koma harðast niður á íbúum í eystri hverfum borgarinnar. Þeir stjórnmálamenn, sem styðja borgarlínu, eru því í raun að kalla eftir verulegum skatta- og gjaldahækkunum.
Skiptar skoðanir hafa verið um borgarlínu meðal borgarfulltrúa Sjálfstæðisflokksins á kjörtímabilinu. Meirihluti borgarfulltrúa flokksins hefur verið andvígur verkefninu eða fjórir af sex. Sú andstaða er í samræmi við skoðun meirihluta sjálfstæðismanna í borginni.
Miðflokkurinn hefur hins vegar tekið rétta og skýra afstöðu í afstöðunni til borgarlínu og í mörgum öðrum málum eins og margoft hefur komið fram í máflutningi kjörinna fulltrúa flokksins. Við teljum okkur því eiga samleið með Miðflokknum.
Við höfum bæði starfað lengi í Sjálfstæðisflokknum og eigum þar fjölmarga góða vini og kunningja. Við þökkum þeim fyrir samstarfið, sem oftast hefur verið gott, og óskum Sjálfstæðisflokknum velfarnaðar.
Komment