Hlaðvarpsstjórnandinn Sölvi Tryggvason deilir áhrifamikilli sögu á Facebook þar sem hann lýsir því hvernig samskipti við einstæða móður í Höfðaborg í Suður-Afríku breytti lífssýn hans.

Sölvi segist hafa hitt konuna sem heitir Christina ásamt ungum syni hennar. Hann segist í fyrstu hafa ætlað að rétta henni pening en þegar hann áttaði sig á að hún var með barn bundið við bakið, bauðst hann til að fara með henni í búð og kaupa mat. Christina hafi brostið í grát þegar hún áttaði sig á að hann meinti það. „Á þeirri stundu fann ég fyrir dýpstu auðmýkt og þakklæti sem ég hef nokkurn tíma upplifað.“

„Inni í búðinni, fyrir hverja einustu vöru sem fór í körfuna, rétti hún upp hendur sínar og þakkaði Guði fyrir blessunina,“ skrifar Sölvi. „Þegar við gengum út úr búðinni sagði hún einfaldlega: „Ég finn fyrir hjartanu mínu núna. Það er galopið“.“

Hann segir frá erfiðu lífi Christinu sem flúði frá Simbabve í leit að betra lífi. Eiginmaður hennar lést í eldsvoða, en hún sjálf varð fyrir alvarlegum brunasárum á fótum. Í Höfðaborg hafi hún verið beitt ítrekuðu kynferðisofbeldi og bæði hún og barnið hennar séu HIV smituð og án aðstoðar.

„Hennar heitasta ósk er að snúa aftur til Simbabve og deyja þar með reisn,“ segir Sölvi og bætir við að hann hafi fjármagnað ferð hennar heim til Simbabve.

„Þegar hún kvaddi sagði hún mér að hún myndi aldrei gleyma þessum degi, deginum sem bænir hennar voru svaraðar. Mínar bænir voru líka svaraðar og ég mun aldrei gleyma þessum degi heldur,“ skrifaði Sölvi.

Sölvi lýsir fundinum sem djúpri lífsreynslu:

„Ég hef nú orðið vitni að nýrri vídd mannlegs styrks. … Það setur allt í samhengi.“

Hann segir að þessi upplifun muni fylgja honum alla ævi og að hann muni aldrei gleyma Christinu og barni hennar.