Það sverfur að Guðrúnu Hafsteinsdóttur, formanni Sjálfstæðisflokksins, í þeim fylgisraunum sem blasa við. Guðrún hafði yfir sér afar góða áru góðmennsku og hlýju og þótti framan af vera yfirveguð í framkomu og tilsvörum. Draumurinn um aukið fylgi með nýjum formanni brást og liðhlaupar flykkjast yfir í Viðreisn og Miðflokkinn.

Hver könnunin af annarri leiðir í ljós hrun Sjálfstæðisflokksins. DV birti um helgina könnun Maskínu sem sýnir stórtap flokksins í Hafnarfirði þar sem Samfylkingin mælist stærsti flokkurinn með 24,5 prósenta fylgi. Þetta væri þó tap frá síðustu kosningum þegar flokkurinn hlaut 29 prósenta fylgi. 

Tap Samfylkingar er þó grín miðað við tap Sjálfstæðisflokksins sem mælist með 21,4 prósenta fylgi í Hafnarfirði en fékk 30,7 prósenta fylgi í kosningum. Könnun Maskínu um fylgi flokksins í Reykjavík felur einnig í sér ótíðindi þar sem 20 prósenta múrinn er í hættu þykir vera vísbending um hátt fall í vor. 

Guðrún þykir bera þess skýr merki að örvænting stjórni orðum hennar í auknum mæli. Eftir því var tekið að þegar falsfrétt Morgunblaðsins um Hamasliða á Höfðatorgi birtist þá stökk Guðrún á vagninn og lét eins og fréttin væri sönn. Innan Sjálfstæðisflokksins er vaxandi óþol vegna formannsins. Hermt er að hluti þingflokks Guðrúnar tali um það í bakherbergjum að tími hennar sé liðinn.

Varaformaðurinn, Jens Garðar Helgason, er sagður iða í skinninu að taka við af henni. Einn höfuðfjandi Guðrúnar er Jón Gunnarsson alþingismaður sem telur tíma formannsins vera að baki. Einhverjir innmúraðir Sjálfstæðismenn vilja fá hann til frekari ábyrgðar í flokknum. Það hlakkar í andstæðingum hins forna flokks sem virðist vera í frjálsu falli ...