Bandaríski grínistinn og leikarinn Alex Duong er látinn, 42 ára að aldri, eftir harða baráttu við krabbamein.

Samkvæmt upplýsingum frá nánum vini fjölskyldunnar, Hilarie Steele, lést Duong á laugardagsmorgun á St. John’s sjúkrahúsinu í Santa Monica í Kaliforníu. Hann var umkringdur fjölskyldu og vinum þegar hann lést.

Duong greindist á síðasta ári með alveolar rhabdomyosarcoma, sjaldgæft og afar árásargjarnt krabbamein, eftir að hafa fundið fyrir höfuðverkjum á bak við auga. Eftir vefjasýnatöku kom í ljós að æxlið var mjög illkynja, og gekkst hann undir umfangsmikla meðferðþ

Hann var þekktur fyrir framkomu sína í þáttunum Dexter, Everybody Hates Chris, MAD TV og Blue Bloods. Í ágúst síðastliðnum stóðu grínistar á borð við Ronny Chieng og Atsuko Okatsuka fyrir styrktarsýningu í Los Angeles til að safna fé fyrir meðferð hans.

Einnig var sett af stað söfnun á GoFundMe til að styðja við fjölskyldu hans. Söfnunin beinist nú að því að styðja eiginkonu hans, Cristinu, og fimm ára dóttur þeirra, Everest.

Andlát Duong hefur vakið sorg meðal samstarfsfólks og aðdáenda, sem minnast hans sem hæfileikaríks listamanns og hlýs manns.