Hjálmtýr Heiðdal, formaður félagsins Ísland-Palestína, gagnrýnir ný lög sem þýska þingið hefur samþykkt og banna yfirlýsingar sem afneita tilverurétti Ísraels. Hann segir óljóst hvaða landamæri Ísraels sé verið að vísa til og veltir því upp hvort lögin taki til landsvæða sem Ísrael hefur lagt undir sig í hernaði.

Í Facebook-færslu segir Hjálmtýr að samkvæmt nýju lögunum geti þeir sem afneita tilverurétti Ísraels átt yfir höfði sér allt að fimm ára fangelsi.

„Þýska þingið hefur samþykkt lög sem banna yfirlýsingar sem afneita tilverurétti Ísraels. Refsingin er allt að fimm ára fangelsi. Þá vaknar spurningin hvaða Ísrael er átt við? Landið sem Allsherjarþing Sameinuðu þjóðanna lagði til 1947? Landið sem Ísrael stal með hernaði 1948–49? Landið sem Ísrael hertók 1967 í Sýrlandi, á Gaza og Vesturbakkanum? Landsvæðin sem Ísrael hefur nú lagt undir sig í Líbanon og Sýrlandi? Eða er átt við Stór Ísrael sem nú er á teikniborðinu hjá Netanyahu og hyski hans?“ skrifar hann.

Með færslunni dregur Hjálmtýr í efa að hugtakið „tilveruréttur Ísraels“ sé skýrt afmarkað og bendir á að mörk ríkisins hafi breyst í kjölfar stríðsátaka og hernáms í gegnum áratugina. Bæti hann síðan við í lokin:

„Þetta er smá flókið fyrir venjulegt fólk - en vefst ekki fyrir síonistum bæði hérlendis og erlendis“