Íslenskur karlmaður hefur verið dæmdur af Héraðsdómi Reykjavíkur fyrir brot gegn valdstjórninni ásamt öðrum brotum.

Maðurinn var ákærður fyrir að hafa staðið að innflutningi á 471 stykkjum af Alprazolam Mylan 2 mg , 200 stykkjum af læknislyfjum með virka efninu díazepam, 184 stykkjum af OxyContin 80 mg, 326 stykkjum af Rivotril 2 mg, 10 stykkjum af Stilnoct 10 mg og 111 stykkjum af lyfinu Quetiapin Actavis 20 mg þegar hann kom til landsins með flugi frá Alicante til Keflavíkurflugvallar.

Þá var hann einnig ákærður fyrir að kýla tollvörð í vinstri síðu og hafa reynt að bíta hann.

Maðurinn játaði brot sín að hluta en neitaði að hafa ætlað selja lyfin og fíkniefnin heldur væru þau til eigin neyslu. Geðlæknir sem bar vitni taldi að maðurinn, sem hefur átt við fíkn að stríða, myndi klára allt sem hann flutti inn á tveimur til fjórum mánuðum.

Karlmaðurinn var á endanum dæmdur í þriggja mánaða fangelsi og er dómurinn skilorðsbundinn til tveggja ára.