Danska lyfjafyrirtækið Novo Nordisk tilkynnti á þriðjudag um „stefnumótandi samstarf“ við gervigreindarfyrirtækið OpenAI með það að markmiði að hraða þróun nýrra lyfja og meðferða. Fyrirtækið, sem er þekkt fyrir lyfin Ozempic og Wegovy, hyggst með samstarfinu styrkja stöðu sína á sviði gervigreindar í heilbrigðisgeiranum.
Í tilkynningu frá Novo Nordisk kemur fram að samstarfið muni setja fyrirtækið „í fremstu röð í umbreytingu gervigreindar í heilbrigðisþjónustu“ og styðja við hraðari þróun betri meðferðarúrræða fyrir sjúklinga. Ekki voru gefnar upp fjárhagslegar upplýsingar um samninginn.
Forstjóri OpenAI, Sam Altman, sagði að samstarfið myndi hjálpa Novo Nordisk að flýta vísindalegri uppgötvun, bæta rekstur á heimsvísu og endurmóta framtíð sjúklingaþjónustu. Gert er ráð fyrir að tilraunaverkefni hefjist á nokkrum sviðum innan fyrirtækisins og að full innleiðing verði lokið fyrir árslok 2026.
Novo Nordisk hefur undanfarið staðið frammi fyrir aukinni samkeppni, meðal annars frá bandaríska lyfjafyrirtækinu Eli Lilly, sem hefur haft áhrif á hlutabréfaverð þess. Þá hefur fyrirtækið einnig þurft að bregðast við svokölluðum eftirlíkingum af vinsælum lyfjum sínum og höfðaði nýverið mál gegn bandarísku fjarheilbrigðisfyrirtæki, Hims & Hers, vegna sölu á samsettum útgáfum lyfjanna.
Lyfjaþróun er bæði tímafrek og kostnaðarsöm, en það getur tekið meira en áratug að þróa nýtt lyf og aðeins eitt af hverjum tíu lyfjum nær markaðsleyfi. Samkvæmt greiningum sérfræðinga nemur meðalrannsóknar- og þróunarkostnaður við að koma nýju lyfi á markað um tveimur milljörðum Bandaríkjadala.
