Sósíalistaflokkur Íslands gerir stólpagrín að Ara Edwald, oddviti Miðflokksins í borginni, í nýju myndskeiði sem birt var á samfélagsmiðlunum.

Ari vakti athygli á dögunum þegar hann birti myndband af sér keyra í Austurstræti frá Pósthússtræti að Ingólfstorgi og kvarta yfir bílastæðaleysi.

Í myndskeiðinu bendir Silja Sóley Birgisdóttir, oddviti Sósíalista í borginni, Ara réttilega á að um sé að ræða göngugötu sem hann keyrði eftir, sem er lögbrot en síðan sýnir hún honum hversu langt er í bílastæðahús.

„Ari, það má ekki keyra hérna, þetta er göngugata. Sástu ekki skiltið?“ segir Silja Sóley í upphafi myndbandsins. Og heldur áfram:

„En ókei, kannski ertu að crave-a að fara á American og þarft að leggja bílnum þínum einhvers staðar. Kíkjum hvað er langt í næsta bílastæðahús.“

Því næst gengur Silja Sóley eftir Austurstræti og upp að bílastæðahúsinu í Vesturgötu. Oddvitinn tók einnig tímann en alls tók það hana tvær mínútur og 17 sekúndur að ganga að bílastæðahúsinu. Bendir hún að lokum á að tvö önnur bílastæðahús séu í næsta nágrenni.

„Þannig að vonandi gengur þér betur næst að keyra löglega og finna stæði.“