Ísraelsher hefur gripið til óvenjulegra aðgerða og stöðvað heila herdeild eftir að hermenn hennar náðust á myndband þegar þeir réðust á fréttateymi CNN á hernumdum svæðum Vesturbakkans í síðustu viku.

Um er að ræða Netzah Yehuda-herdeildina, sem er þekkt fyrir að vera skipuð að stórum hluta strangtrúuðum gyðingum og hefur áður verið sökuð um ofbeldi gegn palestínskum borgurum. Herinn tilkynnti á mánudag að deildin yrði tekin úr núverandi verkefnum sínum.

Þetta er sjaldgæft dæmi um agaviðurlög innan ísraelska hersins vegna hegðunar hermanna. Netzah Yehuda hefur áður verið tengd alvarlegum atvikum, þar á meðal dauða 78 ára palestínsks Bandaríkjamanns árið 2022 eftir að hann var handtekinn af sveitinni. Málið vakti hörð viðbrögð frá bandarískum stjórnvöldum og kallaði herinn það síðar „alvarlegt og sorglegt atvik“. Einn yfirmaður var áminntur og tveir aðrir færðir til í starfi áður en sveitin var flutt af Vesturbakkanum síðar sama ár.

Árásin tekin upp á myndband

Atvikið í síðustu viku átti sér stað þegar fréttateymi CNN var að undirbúa umfjöllun um aukið ofbeldi landtökumanna í þorpinu Tayasir á Vesturbakkanum.

Samkvæmt gögnum Sameinuðu þjóðanna hafa að minnsta kosti níu Palestínumenn verið drepnir af ísraelskum landtökumönnum á þessu ári, og refsiaðgerðir vegna slíks ofbeldis eru sjaldgæfar.

Myndskeið af atvikinu, sem dreifðist hratt á netinu, sýnir hermenn nálgast fréttateymið með vopn á lofti og hrópa að þeim. Fréttamaðurinn Jeremy Diamond sagði að framleiðandi hjá CNN hefði verið tekinn hálstaki.

Hann greindi einnig frá því að hermennirnir hefðu haldið fréttateyminu, ásamt palestínskum borgurum, í haldi í um tvær klukkustundir. Á þeim tíma hafi þeir látið í ljós skoðanir sem samræmast hugmyndafræði landtökumanna, þar sem þeir héldu því fram að allur Vesturbakkinn tilheyrði Ísrael og kölluðu Palestínumenn hryðjuverkamenn.

Á að „styrkja siðferðislegan grunn“

Ísraelsher segir að herdeildin muni ekki snúa aftur til starfa fyrr en hún hefur farið í gegnum ferli sem miðar að því að styrkja faglegan og siðferðislegan grunn hennar.

Ekki eru þó allir sammála ákvörðuninni. Rabbíni sem starfar með herdeildinni gagnrýndi hana í útvarpsviðtali og sagði hana of skjóta og of víðtæka.

Mannréttindasamtök hafa lengi haldið því fram að Ísraelar dragi sjaldan hermenn til ábyrgðar fyrir dauðsföll Palestínumanna. Málin sem tengjast CNN-fréttateyminu og bandarískum ríkisborgara hafa þó vakið meiri athygli, líklega vegna tengsla við Bandaríkin og stóran fjölmiðil.

Rannsóknir án afleiðinga

Aðeins vikum fyrir þetta atvik tilkynntu ísraelsk yfirvöld rannsókn á dauða fjögurra Palestínumanna, þar á meðal tveggja barna, annars þeirra blinds, sem létust í aðgerð hersins í bænum Tammun á Vesturbakkanum.

Engar agaaðgerðir hafa þó verið tilkynntar í því máli og samkvæmt ísraelskum fjölmiðlum hafa þeir hermenn sem komu að atvikinu ekki einu sinni verið yfirheyrðir.

Hér fyrir neðan má sjá myndbandið og umfjöllun um atvikið.