Lögregla á höfuðborgarsvæðinu hafði í nógu að snúast í dag vegna fjölda útkalla sem tengdust þjófnuðum, skemmdarverkum og öðrum afbrotum.
Fjórir erlendir menn voru handteknir eftir að tilkynnt var um þjófnað í fataverslun í miðborg Reykjavíkur. Lögreglu tókst að hafa uppi á mönnunum og var þýfið endurheimt. Þeir voru vistaðir í fangaklefa í þágu rannsóknar málsins.
Einnig barst tilkynning um mann sem var til vandræða hjá fyrirtæki. Í ljós kom að um fyrrverandi starfsmann var að ræða, en hann var farinn af vettvangi þegar lögreglu bar að garði.
Þá var tilkynnt um rúðubrot þar sem gerandi var enn á vettvangi við komu lögreglu. Um var að ræða einstakling sem lögregla kannaðist við. Málið var afgreitt með vettvangsskýrslu. Sami aðili var síðar um daginn tilkynntur tvisvar sinnum fyrir óspektir og var hann að lokum vistaður í fangaklefa.
Annar erlendur aðili var stöðvaður fyrir þjófnað í matvöruverslun og fluttur á lögreglustöð til skýrslutöku.
Í Hafnarfirði var tilkynnt um nokkra grímuklædda menn sem voru með barefli og börðu húsnæði að utan. Mennirnir fóru af vettvangi en lögreglu tókst að hafa uppi á þeim og voru þeir allir vistaðir í fangaklefa vegna rannsóknar málsins.
Þá er til rannsóknar mál þar sem tilkynnt var um mikið tjón á fyrirtækjabifreið eftir árekstur sem átti sér stað um helgina. Lögregla hefur haft uppi á aðila sem grunaður er um aðild að málinu.
Einnig var tilkynnt um innbrot í bifreið þar sem tjónþoli varð vitni að verknaðinum áður en gerendur komust undan. Upptaka er til af atvikinu og þekkti lögregla gerendur. Málið er til rannsóknar.
Loks var tilkynnt um umferðarslys þar sem ekið var á mann í hjólastól á gangbraut. Hraði ökutækisins var lítill. Lögregla ræddi við báða aðila á vettvangi og er málið í rannsókn.
