Skautafélag Reykjavíkur hefur greint frá því að félagið muni keppa við Fjölni í íshokkí til þess að minnast Patreks Freys Sveinssonar en hann lést í umferðarslysi í síðustu viku. Hann keppti fyrir hönd Fjölnis áður en hann gekk til liðs við SR.

„Fyrirhugaður leikur karlaliða SR og Fjölnis í Egilshöll næsta þriðudag verður nú spilaður á heimavelli Patta í Laugardalnum kl. 19.45. Reykjavíkurliðin tvö hafa ákveðið að allur ágóði af miðasölu þessa leiks renni óskiptur til fjölskyldu hans, svo hún þurfi, í sinni ólýsanlegu sorg, að hafa minni áhyggjur af kostnaði vegna andláts sonar síns,“ stendur í yfirlýsingu SR.

„Foreldrafélag SR ætlar að leggja málefninu lið og gefur allan ágóða af veitingasölu á leiknum. Einnig verður glæsilegur kökubasar á leiknum þar sem hægt verður að kaupa bakkelsi til styrktar fjölskyldunni.“

Þá bendir félagið á styrktarreikning þeirram sem er opinn fyrir frjálsum framlögum og að margt smátt geri eitt stórt. - 0511-14-077086, kt. 150886-3419

„Við hvetjum allt íshokkífólk og aðra sem vilja sýna hug sinn í verki, minnast Patreks og styrkja fjölskylduna í gegnum erfiða tíma að mæta í Skautahöllina í Laugardal næsta þriðjudag kl. 19.45. Fyllum höllina - fyrir Patta!“