Kristinn V. Jóhannsson, fyrrverandi forseti bæjarstjórnar Neskaupstaðar og stjórnarformaður Síldarvinnslunnar, er látinn, 91 árs að aldri. Hann lést 3. júlí síðastliðinn. Austurfrétt greindi frá andlátinu.

Kristinn fæddist í Neskaupstað árið 1934. Hann starfaði lengst af sem kennari og skólastjóri Iðnskóla Austurlands áður en hann tók við sem framkvæmdastjóri Samvinnufélags útgerðarmanna í Neskaupstað (SÚN), þar sem hann starfaði til ársins 2005.

Hann sat í stjórn Síldarvinnslunnar í rúma tvo áratugi, þar af sem stjórnarformaður frá 1984 til 2003. Þá sat hann í bæjarstjórn Neskaupstaðar í 24 ár og var forseti bæjarstjórnar frá 1974 til 1990.

Kristinn lét einnig mikið til sín taka í íþróttalífinu og var meðal annars valinn í fyrsta landslið Íslands í körfuknattleik árið 1959. Hann bjó í Neskaupstað nær alla ævi en flutti til Reykjavíkur árið 2024.