Króatíska þingið samþykkti í gær ný lög sem heimila sveitarfélögum að takmarka nætursölu áfengis í verslunum í þeim tilgangi að draga úr drykkjulátum ferðamanna og óeirðum á vinsælum ferðamannastöðum landsins. Allir 117 þingmenn sem voru viðstaddir atkvæðagreiðsluna studdu frumvarpið einróma.
Undanfarin ár hafa íbúar í ferðamannabæjum í Króatíu ítrekað kvartað yfir ölvuðum ferðamönnum sem hafi valdið hávaða, kastað af sér vatni á götum úti og raskað ró íbúa, einkum yfir sumartímann. Myndskeið og frásagnir af slíkri hegðun hafa reglulega farið í dreifingu á samfélagsmiðlum og í fjölmiðlum.
Samkvæmt lagabreytingunni geta borgir og sveitarfélög ákveðið sérstakar takmarkanir á sölu áfengis í verslunum á næturnar til að vernda lýðheilsu, allsherjarreglu, menningararf og umhverfi. Reglurnar ná þó ekki til veitingastaða eða skemmtistaða.
Tonci Glavina, ferðamálaráðherra Króatíu, sagði markmiðið vera að bæta lífsgæði íbúa og stuðla að sjálfbærari ferðaþjónustu. Hann sagði mikilvægt að borgir landsins væru ekki eingöngu til fyrir ferðamenn heldur einnig fyrir heimamenn.
Borgarstjóri Split, Tomislav Suta, hefur þegar tilkynnt að borgin muni banna sölu áfengis í verslunum frá klukkan níu á kvöldin til sex á morgnana. Markmiðið sé að draga úr ölvun og óspektum í miðborginni, þar á meðal við hina sögufrægu höll Díókletíanusar keisara.
Ferðaþjónusta er ein mikilvægasta atvinnugrein Króatíu og stendur undir um fimmtungi landsframleiðslu landsins. Á síðasta ári heimsóttu tæplega 22 milljónir ferðamanna landið.
