Mikil leit stendur nú yfir að sundmanni sem hefur verið saknað í rúmar tvær klukkustundir úti fyrir Örfirisey í Reykjavík. Leit hófst á fimmta tímanum og hefur aðkoma viðbragðsaðila verið umfangsmikil.

Lögregla, slökkvilið með köfunarþjónustu, þyrla Landhelgisgæslunnar og fjöldi sjúkrabíla eru á vettvangi. Þá hafa björgunarskip og sjóbjörgunarsveitir Slysavarnafélagsins Landsbjargar einnig verið kallaðar út.

Viðbragð er einkum miðað við grjótgarðana við Fiskislóð. Björgunarsveitarmenn og lögregla taka þátt í leitinni með björgunarbátum, einkabát og úr þyrlu Landhelgisgæslunnar, sem var kölluð út með hæsta forgangi.

Lögreglan hefur jafnframt kallað út kafara frá sérsveit ríkislögreglustjóra, samkvæmt upplýsingum frá Helenu Rós Sturludóttur, upplýsingafulltrúa embættisins, að því er fram kemur í frétt RÚV.

Að minnsta kosti fjórir sjúkrabílar, körfubíll, lögreglubílar og mótorhjól eru einnig við störf á svæðinu.

Samkvæmt heimildum Mannlífs er sundmaðurinn erlendur en vinir hans eru á vettvangi en vildu ekki tjá sig við fjölmiðla.