Lögreglan hafði afskipti af nokkrum málum á höfuðborgarsvæðinu í nótt og í gærkvöldi samkvæmt dagbók embættisins.

Einn aðili var handtekinn eftir að hafa ekki farið eftir fyrirmælum lögreglu þegar vísa átti honum af vettvangi. Viðkomandi var vistaður í fangageymslu vegna ástands síns.

Þrír einstaklingar voru handteknir grunaðir um akstur undir áhrifum áfengis og fíkniefna. Þeir voru allir látnir lausir að lokinni sýnatöku.

Þá var ökumaður stöðvaður við akstur án ökuréttinda. Málið var afgreitt með vettvangsskýrslu.

Annar ökumaður var stöðvaður, grunaður um akstur undir áhrifum fíkniefna. Auk þess leikur grunur á að hann hafi brotið vopnalög og verið með fíkniefni í fórum sínum. Hann var látinn laus úr haldi eftir sýnatöku.

Einnig barst tilkynning um eld í skúr. Slökkvilið brást skjótt við og gekk vel að ráða niðurlögum eldsins.