Íþróttaálfurinn Magnús Scheving hyggst stofna styrktarsjóð Latabæjar en hann greinir frá þessu í nýjasta þætti af Jákastinu.

Í þættinum ræðir Magnús lífið og tilveruna ásamt því að opna sig um framtíð Latabæjar en eins og greint var frá í fjölmiðlum í fyrra keypti hann vörumerkið aftur en hann bjó til Latabæ sjálfur á 10. áratug síðustu aldar.

„Ég myndi aldrei gera þetta aftur. Þetta tók bara ævina alla. Er það þess virði? Svarið við því er já,“ segir Magnús við Kristján Hafþórsson, stjórnanda Jákastsins um Latabæ.

Hann segir að hann finni mikið fyrir öllum áhrifunum sem Latibær hefur haft á fólk út um allan heim. Þá eru í vinnslu heimildarþættir um áhrif Latabæjar í framleiðslu.

Sorglegt ástand

Þá talar Magnús um styrktarsjóð sem stofnaður verður í nafni Latabæjar en honum er að ætlað að styrkja börn til hreyfingar sem eiga ekki kost á því af einhverjum ástæðum. Hann segir sjóðinn ætla gefa til baka til Íslendinga.

„Við sáum að við Íslendingar borðum minnst af grænmeti í heimi. Það er eitthvað svoleiðis. Við erum með feitustu börn í Evrópu, ég held við séum í fyrsta sæti. Erum í þriðja sæti yfir heiminn, held ég. Það eru biðlistar hjá krökkum sem eru að fara á lyf. Það er sorglegt,“ segir frumkvöðullinn.

„Þess vegna held ég að við getum hjálpað. Þetta er dálítið áhugavert vegna þess að staðan er sú að offitu barna vegna þess að börn eiga ekki að hafa áhyggjur af, eða engin, af hvernig hann lítur út.“