Væntanleg bók eftir blaðamennina Maggie Haberman og Jonathan Swan er sögð valda „miklum kvíða“ innan Hvíta hússins.

Bókin ber titilinn Regime Change: Inside the Imperial Presidency of Donald Trump og á að koma út 23. júní, samkvæmt Axios.

Donald Trump gagnrýndi Haberman harðlega í mars, án þess að skýrt væri á þeim tíma hvað lægi að baki. Í færslu á Truth Social kallaði hann hana meðal annars „skítablaðamann“ og sakaði hana um að skrifa falsfréttir.

Samkvæmt fréttum mun bókin fjalla um hvernig Trump hefur breytt framkvæmdavaldinu og halda því fram að seinna kjörtímabil hans líkist frekar „stjórnarskiptum“ en hefðbundnu forsetaembætti.

Haberman og Swan tóku um 1.000 viðtöl við heimildarmenn fyrir bókina, sem hefur vakið áhyggjur meðal fólks innan Trump-hreyfingarinnar.

Í bókinni er einnig fjallað um umræðu innan stjórnkerfisins um möguleg „stjórnarskipti“ í Íran. Þar er fullyrt að ráðgjafar Trump hafi gert lítið úr slíkum hugmyndum, og einn þeirra kallað þær „kjaftæði“, samkvæmt New York Times.

Í einni lýsingu er sagt frá fundi með Trump, CIA-stjóranum John Ratcliffe, yfirmanni herforingjaráðsins Dan Caine, utanríkisráðherranum Marco Rubio og fleirum, þar sem þeir hafi efast um upplýsingar frá Benjamin Netanyahu um Íran.

Samkvæmt bókinni fólust tillögur Netanyahu í fjórum þáttum: að ráða æðsta leiðtoga landsins af dögum, veikja hernaðarlega getu Írans, hvetja til uppreisnar meðal almennings og að lokum koma á stjórnarskiptum.

Bandarískir embættismenn töldu fyrstu tvo þættina mögulega, en hina síðari óraunhæfa. Ratcliffe er sagður hafa lýst kynningunni með einu orði: „farsakennt“, en Rubio tók undir og kallaði hana „kjaftæði“.