Dómstóll í Taílandi hefur dæmd mann til að greiða sekt upp á 10.000 baht, sem er um 37 þúsund krónur, eftir að hann braust inn í gerði dýrsins Moo Deng, sem hefur notið mikilla vinsælda á samfélagsmiðlum. Þetta staðfesti dýragarðsstjóri á miðvikudag.
Moo Deng hefur vakið alþjóðlega athygli fyrir fjörugt atferli sitt í myndskeiðum sem hafa farið víða á netinu. Vinsældir hennar hafa dregið að tugþúsundir gesta og aukið tekjur dýragarðsins verulega.
Atvikið átti sér stað í síðasta mánuði þegar taílenskur maður fór ólöglega inn í gerði dýrsins í Khao Kheow dýragarðinum, um tveggja klukkustunda akstursfjarlægð frá Bangkok. Þar deilir Moo Deng aðstöðu með móður sinni.
Myndefni sem birt var í þarlendum fjölmiðlum sýndi manninn inni í gerðinu þar sem hann tók upp myndband af dýrinu með spjaldtölvu. Samkvæmt upplýsingum frá dýragarðinum slapp Moo Deng ómeidd, en varð þó lítillega skelkuð.
Forstjóri dýragarðsins, Narongwit Chodchoy, sagði að maðurinn hefði játað brot sitt og verið sakfelldur af dómstól. Hann bætti við að niðurstaðan undirstrikaði að ekki væri heimilt að brjóta gegn réttindum dýra, hvort sem þau væru í haldi eða í náttúrulegu umhverfi.
Frá því atvikið átti sér stað í mars hafa ekki komið upp sambærileg brot, að sögn stjórnenda. Öryggisgæsla hefur verið aukin og starfsfólk fengið frekari þjálfun til að bregðast við mögulegum innbrotum í framtíðinni.
