Birna Hafstein, varaborgarfulltrúi Sjálfstæðisflokksins, hefur sett íbúð sína í Laugardalnum á sölu en um er að ræða fallegt fjórbýli í Sigluvogi.

Íbúðin er 86.1 fm ris á annarri hæð. Opið gott eldhús, stór og björt stofa, og góð stærð á svefnherbergjum. Stutt er í Vogaskóla, leikskóla og alla helstu þjónustu.  Húsið er innst í botnlanga í rólegu hverfi með nóg af bílastæðum.

Birna segir á samfélagsmiðlum að það sé komið að kaflaskiptum hjá henni og börnunum. „Þarna erum við börnin búin að búa í mörg yndisleg ár en nú þurfum við að stækka við okkur. Lokuð gata og fullt af frábærum nágrönnum,“ segir hún um íbúðina. Þá telur hún götuna heilt yfir þá bestu og þar ríki mikil veðursæld.