Dr. Þráinn Eggertsson hagfræðingur og fyrrverandi prófessor við Háskóla Íslands lést í Reykjavík í gærmorgun, 85 ára að aldri.
Morgunblaðið greinir frá andláti hans.
Þráinn fæddist í Reykjavík 23. apríl 1941. Hann lauk stúdentsprófi frá Menntaskólanum í Reykjavík árið 1961, BA-prófi frá háskólanum í Manchester árið 1964 og doktorsprófi frá Ohio State University árið 1972. Doktorsritgerð hans fjallaði um efnahagsleg áhrif háskólamenntunar sem fjármögnuð var með námsstyrkjum til bandarískra uppgjafahermanna eftir síðari heimsstyrjöld.
Hann starfaði hjá OECD í París á árunum 1964 til 1965 og hóf síðar kennslu við Háskóla Íslands, þar sem hann gegndi stöðum lektors, dósents og prófessors um áratugaskeið.
Þráinn var meðal frumkvöðla nýrrar stofnanahagfræði og skrifaði fjölmörg áhrifamikil fræðirit og greinar sem vöktu athygli víða um heim. Hann var sæmdur heiðursdoktorsnafnbót Háskóla Íslands fyrr á þessu ári ásamt Guðmundi Magnússyni fyrir framlag sitt til uppbyggingar hagfræðinnar hér á landi.
Fyrir vísindastörf sín hlaut Þráinn meðal annars viðurkenningu Ásusjóðs Wright árið 2001 og var sæmdur riddarakrossi hinnar íslensku fálkaorðu árið 2006.
