Þýska herskipið Brandenburg lagðist í gær inn á Vopnafjörð til að leita skjóls vegna veðurs, með samþykki íslenskra stjórnvalda. Frá þessu segir Austurfrétt.

Skipið sást fyrst við Norðfjarðarflóa síðdegis í gær en sigldi þaðan norður á Vopnafjörð og kom þangað um níuleytið í gærkvöldi. Það hélt sig inni á firðinum yfir nóttina en lagði aftur af stað um átta í morgun og tók stefnuna norður.

Samkvæmt upplýsingum á skipaskrám er ferð skipsins heitið til Grikklands. Landhelgisgæslan staðfestir að Brandenburg hafi haft leyfi til komu hingað og að tilgangurinn hafi verið að leita vars undan veðri. Ekki eru veittar frekari upplýsingar um ferðir þess, samkvæmt Austurfrétt.

Skipið er freigáta í þjónustu NATO. Þýskir fjölmiðlar hafa greint frá því að þýsk herskip hafi nýlega tekið þátt í verkefnum á vegum bandalagsins, meðal annars í Norðursjó og Eystrasalti. Þá tóku þýskir hermenn þátt í æfingu á Grænlandi í janúar.

Brandenburg var tekið í notkun árið 1994, er um 139 metra langt og 17 metra breitt. Heimahöfn þess er í Wilhelmshaven og hefur það að undanförnu oftast verið við störf á hlýrri hafsvæðum, meðal annars á Miðjarðarhafi.